ZPM chuan an duhthusam ram an sawi a, an sawrkar a, a takah an tum ang a lo ni leh si lo niin MNF hruaitu Dr R Lalthangliana chuan a sawi.
Lai Autonomous District Council-a MDC by election leh village council inthlanpui awm tura thawh dun tum MNF leh Congress party chuan campaign an khuhhawn hnu ah a khuhhawngtu MNF senior vice president Dr R Lalthanglian chuan Nilaini khan Lawngtlaiah thuthar thehdarhtute kawmin MNF-Congresss MDC-te nen an inkawm bawk.
MNF leh Congress chu party ruhrel lian leh nghet an ni tih a sawi a. Kum 30 politics khela MLA a nih ve tawh hnuah MNF leh Congress chuan ram tana thil tha nia an hriat chu tha takin an inchhunzawm sak mai thin a, sawrkar hmasa thil tih sawichhiat chiam chiam an ching ve ngai lo tih a sawi.
“ZPM kal dan erawh a hun la rei lo mah se, hriatthiam a har a, sawrkar hmasa thiltih an sawisel nasa hle. Sawrkar thar hi pawl hrang hrang 6 vel kalkhawm, mize inanglo tak tak an ni a. Chief minister, minister leh an MLA thenkhatte hi vawi khat mah la ni ngai lote an ni. Manifesto of visionary (duhthusam ram) an sawi a, an han sawrkar a, an tum ang a lo ni si lo,” Dr R Lalthangliana hian a ti.
India ram inawpna danah village council chu dinhmun pawimawh tak a ni, tiin, mi rintlak thlang chhuak turin a ngen tih MNF hruaitu hian a sawi. Tunlaiah chuan sawrkarah VC-te an pawimawh ta hle a, sawrkar khalhngil turin ruling chauh ni lo, opposition-in an pawlh chu a that vena chin a awm tih a sawi bawk.
ZPM duhthusam ram atangin a takah an tum ang a lo ni lo – MNF sr vice president
