Zoram Peoples Movement Working President, K. Sapdanga chuan ZPM party chu ZPM sawrkar siam tura piang a nih loh thu leh mipui sawrkar siam tura piang a nih thu sawiin, a member-te pawh ram siam tura in pe an nih thu a sawi.
K. Sapdanga chuan an campaign lai pawhin thawkrim ber tura an infuih thin thu sawiin, party dang pawh in an thawkrim tih an pawmpuii nia a hriat thu a sawi a. Sawrkarna chu party membership atanga siam theih a nih loh thu leh neutral te an pawimawh em em tih sawiin, ngawi renga sawrkar inrelbawl dan ngun taka lo zir a, an duhna taka vote thlak tute hian sawrkar an siam mai thin tih ZPM te chuan an pawm thlap tur tih a sawi a.
Pathian zara sawrkarna an lo siam a nih pawhin an thutiama an din leh din loh chu mipui ten an buk nghal dawn tih sawiin, thuneihna an lo chang a nih pawhin chu thuneihna dawhkana dahtu chu a bul berah Pathian a nih rualin Pathianin hmanruaa a hman chu mipuite an ni tih a sawi a. Mipuite duh dana an kal lo a nih chuan a paihthla leh theitu chu anmahni bawk an ni tih sawiin, kan ram damna tur chu inngaitlawm taka kan tawngtaia Lalpa kan auh leh Ani’n min lo ngaihdamin a ni tih a sawi a. Inngaihtlawm nen lo chuan ram damna kan thleng dawn lo tih a sawi bawk.
ZPM Working President chuan, “Inthlan hma zawng in an policy leh manifesto-te chu mipui hmaa an keu thin thin thu sawiin, Pathian leh mipuite zara an lo sorkar ve hlauh a nih chuan, chu an policy bu tho chu mipuite’n an keu khum tur thu leh an chhiar khum ve thung tawh dawn tih a sawi a. Thu tiam zuk a, ding nghet leh si lote chu mipuite’n an ngaithei lo tih kan theihnghilh tur a ni lo tih sawiin, hnehna kan lo chang mial a nih chuan mipui tanpuina dila kan au kual laia kan candidate ten corruption-a inhnamhnawih hauh lo tura an intiamna chu an intiam ang ngeia an din tlang theihna turin mipuite chu tanpui theitu hnai berte an ni tih a sawi bawk.
ZPM Working President chuan, Val Upa Council-te chu an pawimawh lehzual dawn tih sawiin, anni chu hlemhletna laka an fihlim theihna tura an chakna thahrui, vengtu rinawm, thlamuantu hnai reng an ni dawn a tih a sawi a. Anni uapna hnuaiah thianghlim takin mipuite rawng an bawl theih a beisei bakah eng dinhmun pawh sawisel lova lungawipui turin candidate te ziaka an intiam thu a sawi a. Inngaitlawma tawngtaiin Lalpa au ila, Politics a kan luh chhan hi mimal hamthatna ni lovin ram siam tum kan ni tih i hre thar leh theuh ang u,” a ti bawk.
ZPM hi mipui sawrkar siam tura piang a ni – K. Sapdanga
