Daily Newspaper

ZPM hruaitu-ah thutawp siamtu tur VUC – Lalduhoma

8

Zoram Peoples’ Movement party hruaitu lailawk ten hun hmang zo tawh mah se, hrileng karah hruaitu thar thlan theih a nih rih loh avangin thutawp siam turin Val Upa Council kuta dah a ni tih ZPM Legislature Party leader Lalduhoma chuan a sawi.

Thuthar thehdarhtuten an kawmnaah Lalduhoma chuan, kum khat chhung atana an party hruaitu lailawka ruatte hun chu August 5 khan an hun a tawp tih a sawi a. Hemi denchhen hian party thenkhatin ZPM chu inthlang tur leh kehchhe hial tur anga sawiin, amah chu president chuh tur leh lamtang pawh siam vek tawh anga thu an thehdarh chu thudiklo a ni tih a sawi.

Tunhnai maiah chuan hruaitu thar hi thlan theih a ni dawn lo tih sawiin, “Inthlang tur chuan general assembly koh a ngai a, tunlai hrileng karah hei hi tih theih a ni lo hrim hrim. General assembly neih theih hun tur pawh hriatlawk a ni lo,” a ti.
Party kal zel dan tura thuneitu sang ber Executive Committee thukhawm tur pawhin sawrkarin mi 50 aia tam awmkhawm a phal loa, thutkhawm theih a ni lo tih ZPM Legislature Party leader hian a sawi a. Hei vang hian an hruaitute pawh dinhmun lai takah an ding mek tih sawiin, “ZPM Political Affairs Committee chuan kal zel dan tur hi Val Upa rel turin a dah a, chutah chuan ngaihdan emaw duhdan emaw engmah tel loin thutlukna siam tura tih an ni a, an thutlukna chu thutawp a ni dawn a, chu chu keimah telin kan kan pawm tlan tur a ni,” a ti.

VC leh LC inthlanna neih tura khaw thenkhata an party-in thawhpui a neih chungchang zawhna chhangin Lalduhoma chuan, Headquarters emaw Block emaw hriatpui a nih loh thu leh Unit level-a an lo inremsiamna mai a ni tih a sawi a. Khaw thenkhata Congress party nen an thawh ho vang hian a chunglamah Congress nen inzawmna an nei tihna a ni lo, tiin, “Congress leh MNF pawh khaw pahnihah an thawkdun a, Congress leh MNF chu thawk hoah tumahin an puang chuang lo,” a ti.

Rorel lai party candidate thlan chungchangah, tunhma chuan VC-ten budget-ah a hranin sum an nei ngai loa, hei hi a tha loa hria in ram danpui siamthat vawi 73-naah khaw mal tinte chanvo chu budget-a awm turin ruahman a ni a, kumin atangin a taka kenkawh tan a ni tih ZPM MLA hian a sawi. “15th Finance Commission-in khaw tina VC-te sum insem tur vaibelchhe 93 a ruahman a, ruling VC nih vangin an chan tur chengkhat mahin a pung dawn chuang loa, eptu VC nih vang pawhin an sum chan tur a kiam dawn lo. Ruling VC neih tul anga inzirtirna awm thin chu a bo tawh a ni,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy