ZPM-in BJP thawhpui an chak

ZPM chuan BJP thawhpui an chak em em tih Congress Thalai president Laltawnliana chuan a sawi.
“Sawrkar tha leh kalphung dik” tih thupui hmanga Congress Thalai Hqrs-in street campaign a huaihawt kalzelah Thawhlehni khan Sesawng Bazar-ah street campaign an nei a. Congress Thalai president hian Mizoramah Mizo chauh kan awm loh avangin BJP-in an party ticket-in seat hnih khat chu lak theihna remchang an nei ve thei a, mah se, BJP hming loin seat tam tak an la thei bawk tih hriat a tha tih a sawi. “MNF hi BJP thawhpui chiang taka kan hriat an ni a. MNF i vote chuan BJP i vote tihna a ni. BJP thawhpui chak em em ZPM an awm bawk a, Pu Duhoma’n Mizorama kan sawrkar chuan BJP nen hian thianah kan insiam tho tho dawn, a tih kha kan la hre vek ang. Heng zawng zawng ngaihtuah hian kan himna ber tur chu Congress party hi a ni tih kan hriat a ngai,” a ti.
Mizo Kristian-te chu buma awm tawh lo tura chahin, “Party thenkhat chuan sum chakna hmangin i vote kha rawn lei an tum dawn, in chhungkua rawn lei an tum dawn, thenkhat chuan an tawngkam thiamna hmang leh ‘enchhin’ tih thupuia neiin in vote rawn lei an tum dawn. BJP sum an rawn hmachhuan maithei bawk. Chumi hunah chuan fing tak leh Lalpa hrerengin lo awm ang che,” a ti.
Vairama Hindu ngeite pawhin BJP sawrkar chu India sawpchhetu leh sakhaw zalenna pawngsualtu an ni tih hriain BJP an duh tawh loh thu an tlangaupui tawh a. BJP MP zingah pawh sakhaw tenaute an nghaisak dan chu duh loa BJP an sawichhiat tawh laiin, Mizo Kristian-te berin BJP kan lo la thawhpui leh BJP thawhpui kan la chak em em mai chuan ngaihtuahna a tithui hle tih Laltawnliana hian a sawi a. Kan zalenna kan hralh a ni tih kan hre loa, kan harhchhuah hunah chuan a tlai tawh lutuk ang tih a hlauhawm hle, tiin a sawi.
Mizo mipui chu thlarau indona puang tura sawmin, kan sakhuana leh Kristianna lungphum sawinghina a awm mek laiin ngaih tha deuha awm a hlauhawm tih a sawi a. Kumin kumtawpa MLA inthlang turah pawh kan state chu a pawimawh rualin, a aia zau deuh ngaihtuah a ngai tel tih Congress Thalai hruaitu hian sawiin, “Duh kan thlan dik a pawimawh zia chu Manipur atang hian kan hre thei a. An ni pawh dunthlanna hun pek an ni. Zohnahthlakte leh tribal hote pawh khan BJP kha a tha emaw tiin an vote a, an duh angin BJP sawrkar an thlang a, chumi rah chu tuna an thil tawn mek hi a ni ta a ni,” a ti.