CSS thawktuten sawrkara thil phut neia hna thawk loa lungawi loh an lantir mekah Ningani khan sawrkar lam thu an nghak nileng a, Zirtawpni hi chuan lungawi loh an la chhunzawm rin a ni.
All Mizoram CSS Employees Coordination Committee (AMCECC) chuan chief minister hoin an thil phut chungchang sawiho tur nia insawiin, Ningani khan an hruaitute leh sawrkar hotute inbiak chhungin an thu leh hla ngaichang turin Aizawl leh Mizoram hmun dangah pungkhawm turin an inhriattir a. Hemi ang hian an member an pungkhawm a ni.
AMCECC hruaitute atanga The Aizawl Post thudawn danin, Ningani chhun lam hian sawrkar hotute nen an inbe loa, ZPM party hruaitute thutkhawm an nghak a. Zan dar 6.00 velah ZPM Coordination Committee thuchhuak an hre chauh a, zan dar 6.45 thleng vel khan palai hna thawk tur he Committee member secretary thuken an la nghak tih an sawi. Hei vang hian tiamchin awm loa hna thawk loa lungawi loh an lantir mek chu vawiin – September 19 atan chuan call off hman an inring lo tih an sawi a ni.
Ningania ZPM Coordination Committee thukhawm chuan, CSS employees chungchang hi a sawiho a. Sawrkar hmasa duansa CSS Employees Regularization Scheme chu tidanglam loa hman chu a khirh deuh niin a hria a, danin a phal chinah awlsam deuh zawka siamthat leh nise, a ti. Hei vang hian, CSS employee-te hna ngai chhunzawm tawh turin a ngen tih a sawi a ni.
Hetihlai hian AMCECC chuan, sawrkarin CSS Regularization Scheme a siam chu an hman ve theihnan a tul anga siamthat an duh avangin kumin April atang khan an lo nawr tan tawh tih a sawi a. Heti chung pawha sawrkar lam atanga thu leh hla engmah a awm loh avang leh inbiakna a awm loh avangin September 17 atang khan an thu thlen nawrna atan tiamchin awm lo lungawi loh an lantir tih an sawi
State sawrkarin CSS dinhmun atanga regular turin Article 14 & 16 in a phal loh thu leh dan kalh a nih thu a sawi chu, he hian hnam hnuaihnung an nihna leh rethei zawkte tana hamthatna a siamsakna a ni zawk tih a sawi a. Hei hian an regular-na tur a dal loh thu leh sawrkar lamin Article 14 & 16 hi an hman dik loh thu an sawi. Tun dinhmunah sawrkar lamin an harsatna chinfel aiin harsatna siam zel an tum nia an ngaih thu an sawi bawk.
Regularization of CSS Employees Scheme 2024 Provision No.2 ah “who were duly engage through the proper recruitment process by the competent authority” tiin a inziah thu leh CSS chu scheme/project a nih angin, an competent authority chu scheme hnuaia Committee din zel an ni tih an sawi a. Heng Committee lak dan hi pawm mai theih a nih bakah CSS an nih angin, state sawrkar hnuaia contract leh provisional employee-te nen an inan loh avangin State Recruitment Rules an zawm ve kher a ngai lo tih an sawi a ni.
ZPM-in scheme siamthat tul an ti CSS thawktuten nilengin lo nghak
