ZPM chuan lalna leh thuneihna an duh avangin Mizoram mipui bumin retheihna khurah an hruailut mek tih Congress president Lal Thanzara chuan a sawi.
Village council inthlan neih tura campaign-a chhuak MPCC president chuan ZPM sawrkarin kan lei sak ang che u, an tih thlai chingtuten an thlai chin sawrkarin a rate a tihchhiat sak vek avangin hmunphiah an hralh thei lo a. Chutih laiin ZPM sawrkarin buhfai zaa zaa a tih to avangin ration buhfai lakna pawisa pawh nei loin meialh enin an awm a. Lalna leh thuneihna chan an duh avanga Mizoram mipui bumin retheihna khurah mipui hruailutin, an nawmsakna atan miretheite lu chunga vaivut pawh an it tawh tih a sawi. “Ram mipui manganga rum tirtu ZPM sawrkar hian miretheite enkawltu Pathian pawi an sawi a ni,” a ti.
Thil reng reng a chhe thei ang bera chhuah a, sawrkar kal tawhah kawng a chhia, tia phun phun thin ZPM sawrkarna hnuaiah thal laia lirthei neitute nawrh ngai khawpin kawng a chhia tihLal Thanzara hian sawiin, “Mizoram mamawh lakna kawng a chhiat em em laiin kuhva leh ruihhlo tawlhna kawng erawh a tha em em si hian sawrkar kalsual neih pawi zia leh mangan thlakzia a tichiang. Hna pawh thawk hman loin thu belhchian dawl lo an sawi tam lutuk sawifiah reng rengin an hmanhlel a ni,” a ti.
VC leh LC tha neih a ngai tih Congress hruaitu hian a sawi a. VC tha kan neih loh chuan khawtlang tha kan nei dawn lo tih a sawi. “Khawtlang tha kan neih loh chuan chhungkua leh kohhran nun thlengin kan tuar dawn. ZPM sawrkarin an duh duha an kawih hera an inhaivur bikna tur an duh avanga khawtlang roreltute inthlan ngai ta hian Congress party min kaiharh a, ZPM leh MNF unau ten Congress party nasa takin an zawm phah ta zawk a ni,” a ti. Tun atanga reiloteah Mizoram mipui tan hna tha an thawk leh dawn tih a sawi a ni.
ZPM-in Zoram mipui an bum – Congress president
