ZPM kal dan sawiseltu ZPM atangin chawlhtir

ZPM sawrkar kal danah kalphung thar a awm lo nia sawitu an party consultant chu a nihna atangin party president-in a chawlhtir.
ZPM treasurer hlui, consultant ni mek C Laltanpuia hian Thawhlehni khan thuthar thehdarhtute hmaah ZPM party an din tirha policy an duan angin an kal zui loa, kalphung thar an zawrhah kalphung thara kalna a awm lo niin a sawi a ni. ‘Kalphung thar’ a tih, policy/ project 14 a puanchhuah tur thu sawiin, zantin, Pathianni zan tel loin July 8 atanga ni 14 chhung chu zan dar 7.00 ah ama Youtube channel – ‘C Laltanpuia’ tihah a mal te te in a puangchhuak dawn tih a lo sawi tawh a ni.
A thil tum a puanchhuah tum hian ZPM sawrkar kal mek danah a duhkhawp loh a sawi a. Hemi kaihhnawiha zawhna awmte a chhang bawk.
July 8 – Nilaini khan ZPM President Lalliansawta chuan office order tichhuakin, an party consultant C Laltanpuia chuan party hruaitute rawn loin press conference a ko a, ZPM party tihminghliau zawnga a chet bakah ZPM sawrkar a sawichhia nia sawiin, ZPM Danpuiin thuneihna a pek angin consultant a nihna atangin a chawlhtir tih a sawi. ZPM primary member a nihna chungchang erawh ZPM Political Affairs Committee ngaihtuah tur a ni tih a sawi bawk.
Hetihlai hian Nilaini vek khan ZPM party chuan hriattirna tichhuakin, ZPM president Lalliansawta chu taksa lama harsatna avangin engemaw chen a chawlh a ngai dawn a. A chawlh chhunga president dinhmun luah turin vice president VL Zaithanzama, MLA chu charge a pek angin, 2026 July 10 atangin thu leh awm hma chuan president charge hi a la dawn tih tarlan a ni.