ZPM kalphung chu a bul atangin a diklo nghal a, an party hotuten an party dan an bawhchhia tih MNF treasurer K Vanlalauva chuan a sawi.
June 19 zana Aizawl East-I bial chhung Thuampuia an party programme huaihawt a hmanpuinaah MNF treasurer chuan ZPM chu Lunglei lamah an thawm a len hle rualin an mi leh sa, mi pawimawh tak takten an bansan chur chur mek nia sawiin, tunhnaiah bial tam takah MLA candidate an puan dan chu anmahni chhungkuaah pawh firfiak taka thuneihna kalpui an nih dan leh an lungrual loh zia tilangtu a ni tih a sawi bawk.
ZPM constitution bung 11:11 chu ZPM hotuten an bawhchhe nghal, tiin, an MLA candidate puanah an vice president leh treasurer an tel lo tih a sawi a. ZPM kalphung chu a bul atanga a kal dik loh hle thu te, candidate 35 a nghet ni lo, an ti mai mai an tih rualin Val Upa Council-in an nemnghet leh vek tho si chu mak a tih thu a sawi a ni.
ZPM leader Pu Lalduhoma chuan Pu Laldenga a boral laia a thusawiah, Pu Laldenga anga leader tha Mizo zingah an awm lo tih a sawi a ni, tiin, Pu Duhoma hian MNF a zawm ve laiin, a ni chu thusawi mi a ni a, nihna pawh pe lo tura tih laiin, reilote a awm hnu ah a nihna thar general secretary chu hmang thiam loin high command engemawzat a lo thunun hman a. MLA candidate turin mi tam tak a lo tiam hman tih K Vanlalauva hian a sawi. “MNF dik tak chuan khatiang thil tenawm kha kan ti ve ngailo,” a ti.
Tunah Pu Lalduhoma tactic bawlhhlawh chhia Mizoramah a leng leh mek tih sawiin, “Politics khawvela mi hlauhawm ber chu thusawi thiam, Pu Lalduhoma ang mi rinawmlo hi an ni. Mahni party din ngei pawh kalsan zung zung thin Pu Duhoma hruai ZPM hi mi rinawm lo kalkhawm, party hrang hrang atanga tlantau kalkhawm an ni,” MNF hruaitu hian a ti a. Hetiang hi ZPM kal dan anih avangin ZPM chi khat a pian leh thuai a rin thu leh tunah an buai em em mek thu sawiin, hei aia an la buai dawn chauh a rin thu a sawi bawk.
ZPM kalphung hi a bul atangin a dik lo – MNF treasurer
