Mizoram Legislative Assembly Session neih mekah ruling party-te khawsak dan chuan mipui nuih a ti za in beisei a bo hleah an ngai a; House zahawmna an tihniamin an che nawi hle tih MNF party chuan an sawi.
MNF Gen. Hqrs. thuchhuak chuan, ZPM MLA thenkhat House-a kuhva thial nuau nuau leh minister bengek lo hawlh mawlh mawlh hmuh tur an awm bakah MLA-in speaker dan an hrilhfiah a, an ihnial zuite chu House-a thil hmuh tur vang tak a ni tih a sawi.
Healthcare bill chungchang Health minister an zawhnaah chhan theih a nei lo leh House leader chhang tura a ti ringawt mai chu mak an tih thu te, House leader-in a chhan deuh ngai minister chu awm zeuh zeuh thin mah se, hetianga zawhna pumhlum chhan theih loh tawp chu House-a a thlen vawikhatna nia a lan thu te a sawi a ni.
Sawrkar atanga bill lut, minister pakhatin a hnial kalh chiam mai chu thil thleng ngai lo, ama sawrkar ngei rintawk lohna lantirna a ni tih a sawi bawk.
‘Hei lo pawh hi ruling MLA-te nawina sawi tur a awm nual a. House leader hoin thu belhchian dawl lo sawi an nei nual bawk. House hi a zahawm a, thu belhchian dawl lo sawina hmun tur a ni lo, tih hre turin ZPM MLA-te kan chah a ni,’ a ti a. Mizoram rorelna sang ber zahawmna humhim hram tur leh inzir ve deuh turin ZPM MLA leh minister-te an ngenin an chah tih a sawi.
Hetih rualin eptu MLA-te House zahawmna vawnhim leh an mawhphurhna hlen kawngah fakawm an tih thu MNF hian sawiin, ‘Leader of opposition kaihhruaina hnuaia sawrkar khalhngil kawngah leh sawrkar kallai thlawp an tul huna thlawp kawngah nachang an hria in, an thawhrimna a chhuanawm kan ti takzet,’ a ti.
A bikin MNF Legislature Party-te, thil diklo phawrh chhuah leh sawisel ngaihna huna an huaisenna a ropui an tiin, khalhngil ngai sawrkar hrawn mek khalhngil kawngah huai taka pen zel turin an ring tawk tih a sawi a ni.
ZPM member-ten House zahawmna tihniam – MNF
