ZPM sawrkarin ni 100 programme a kalpui chhungin kuthnathawktute tharchhuah lei sak tura an tih ho zingah lei theih tur awm nual tawh mah se, lei sak an nei loa, kuthnathawktute tibeidawngtu ah an tang ta zawk tih MNF party chuan an sawi.
MNF Media & Publicity general secretary VL Kroshnehzova chuan, ZPM party-in mipui hnena an inzawrhna hrang hrang zingah thlaithar leisak an sawi chamchi a, thlai thar an lei tur hmunphiah, sawhthing, aieng leh hmarcha chu a man tur nen lam tarlangin mipuia inzawrh nan an hmang a. Vawiin thlengin a tak ram hmuh tur ala awm loa, beiseina sang tak nena thlirtu kuthnathawktute an tibeidawng nasa hle tih a sawi.
Sawrkarna an chan hnu ni 100 programme-ah pawh hei hi tarlangin, hemi chungchanga hma an lak tur thu hi Asembly Session neih hmasak berah larsap an sawichhuah tir a, kumin Republic Day-ah larsap hi an sawinawn tir a. Hei bakah hian chief minister chuan thlai thar leina tur cheng vaibelchhe 110 dah a nih thu a sawi bawk a. Chutihlaiin thlai thar an lei thawm hriat tur a awm ta rih lo tih a sawi a ni.
Kuminah hmunphiah hi ZPM sawrkarin lei tura an insawi hnuah an lei leh tak si loh avangin hralhna an hmu mumal loa, hmunphiah chingtuten sum tam tak an hloh phah tih MNF hruaitu hian sawiin, sawrkarin leisak chu sawi loh, leisak a tum avanga phai lam atanga rawn lei tumtute pawh titiauin, a chingtu tam takin a hralhna tur an hmuh loh phah tih a sawi bawk.
A lei tur firm pakhat – RR Associates nen an inbiak laiin kuthnathawktute tana kawl a eng tan ta, tia hahipa ZPM-in an thehdarh kha agreement an ziahpui loh thu an sawi leh daih si nia sawiin, “A hnuah CM berin kan mi rinte an rintlak loh a ni mai a, thiamlohna kan neilo, tiin a sawi a. State khat sawrkar ve meuhin firm puitling anga a dawr rintlak an ni lo a nih chuan he sawrkar fimkhur loh zia a tilangah kan ngai a. Sawrkarna an chan theih nan ZPM hian kuthnathawktute an bumah kan ngai,” a ti.
ZPM ni 100 programme-ah Kuthnathawktute beidawng – MNF
