State sawrkar sum lakluhna lian ber, Goods and Services Tax (GST) atanga sum lakluh chu ZPM sawrkar ni 100 hnu ah nasa takin a tlahniam tih MNF adviser Robert Romawia Royte chuan a sawi.
Hachhek bialtu MLA ni bawk hian a bial chhung khua fangkualin Lok Sabha inthlan turah a campaign a. ZPM sawrkar chu sum enkawlah a hlawhchham tih sawiin, ni 100 chhungin Mizoram sum lakluhna lian ber GST atanga sawrkar sum lakluh chu nasa takin a tlahniam tih a sawi.
“2023 February-a Mizoramin GST atanga sum a lakluh chu 14% (-14%) in a tlahniam a. March 2024-ah phei chuan March 2023 aiin 29% (-29%) in a tlahniam ta duai a, March 2024-a state & UT GST report thar berah chuan Mizoram chiah India ram state leh UT zingah GST tlakhniamna awmchhun a ni,” a ti.
A biala hmunphiah hralhna hrelote tawrhna chu hmuh hrehawm a tih thu sawiin, Assembly Session-ah meuh pawh sawrkar hotuten dawt an sawi thin chu pawi a tih thu a sawi bawk.
Lok Sabha MP thlang turin ngaihna fim tak hmang tur leh party politics dah boin kohhran, ram leh hnam leh hnuaihnung leh tlem zawkte humhalh ngam Pu K Vanlalvena vote theuh turin a sawm tih a sawi. “Mizo mai ni lo, North East tribal dangte pawhin an ngainat leh an thlamuanpui em em a ni a. Pathian tih em em tu, mi rinawm leh huaisen; sum leh a nun danah sel tur awm lo hi Mizoram aiawhtu atan a tha ber tih hriatchian sa a ni,” Robert Romawia hian a ti.
ZPM sawrkar hnuah GST a tlahniam nasa – Robert Romawia
