ZPM sawrkar pawikhawih hi kan siamtha leh vek ang – Zoramthanga

ZPM sawrkar pawikhawih
hi kan siamtha leh vek ang
– Zoramthanga
ZPM sawrkar pawikhawih ho chu MNF sawrkar leh hunah siamthat leh a ni anga, nuaibo vek a ni dawn tih MNF hruaitu Zoramthanga chuan a sawi.
Thawhlehnia Thorang bial, Lungsena an party programme siamah MNF president Zoramthanga chuan, hnam thinlung pu thalaiin ZPM sawrkar an kham tawh tih a sawi. Pathian remruat vangin MNF a tla a, ZPM a sawrkar a, enchhin sawrkar mai an ni, tiin, saiip puan sina bul tan chu zu khapna dan ennawnna in a zui tih a sawi a ni.
Contract hna inpeknaah nasa takin ZPM sawrkarin pawi an khawih nia sawiin, “Ram an hralh a, kan rohlu tihral an an tum zel bawk. Kawng chhiat lutuk avangin hnamdang phei chuan lirthei chunga chuang chung pawhin kawng an hmu thei lo hial. Dawt an sawi zozai hi sawi sen a ni loa, dawt sawiah pawh hian chintawk a awm asin mawle, tih hial tur an ni,” a ti.
“ZPM sawrkar pawikhawih zozai hi MNF sawrkar leh hunah siamthat leh a ni anga, nuaibo vek a ni ang. Opposition party atangin ruling party-ah an lut thin a. Tunah erawh ruling atangin opposition MNF-ah hmun hrang hrang atangin an rawn lut zel,” a ti bawk.
MNF president hian Serchhip leh Hnahthial-a Mizo Hnam Run a tlawh nghal a. Hmuntinah kawng a chhia a, kawng siamthatna tur chhiah an la chung pawhin kawng siamthat a ni chuang lo tih a sawi.
“Aizawl khawpui mamawh khawp pawh tui pump theilote hian tuikhuaha tui pump an tum thu an sawi a. Hmun tinah enchhin fuh lohna thawm a ri ring hle. MNF tlinpui kum kan thleng leh mai dawn a, theihtawp chhuah zel ang u,” tiin party mite a fuih.