Treasury sum khuahkhirh chungchangah ZPM sawrkar chuan sawrkar hmasa hunlaia an party mite tawngkam cheh ang chiah an chungah a tla ve ta tih MNF party chuan an sawi.
MNF Gen. Hqrs. thuchhuak chuan, 2023 December chawhnu lam ni 15 chhung khan emergency-a pekchhuah tul tak tak bak regular payment chu state finance lamin treasury an tihtawp tir vek a. Hemi chungchang sawichhuaktu, MLA Lalchhandama Ralte chu thudik lo sawi ang hialah puh a ni a. Thudik a sawi ngei si tih a sawi.
‘Sawrkar hmasa Finance minister chu ZPM hian sum enkawl thiam lo leh titha duh lo ang hialah an puh thin a. MNF sawrkar laia treasury-in sum pekchhuah a control zeuh zeuh thin kha treasury khar tiin an lo aukhum chamchi tawh. Sum enkawl thiam tura insawi ZPM sawrkar chuan a rawn tawng ve ta a. An tawngkam cheh ang chiah an chunga tla ta hi, anmahni ngumkhak hmu lo ang maiin, treasury khar a ni lo, tiin an tangkawh leh ta a ni,’ a ti.
Sum enkawla harsatna an tawh chu thup buai lo tur leh an harsat avanga Open Market Borrowing atanga cheng vaibelchhia 80 an puk chu sawimawi tum loin, sum enkawl an thiam loah inngai se an duh tih MNF hian sawiin, treasury thawktute hmanga insawithiam tum chhen tawh lo turin a phut tih a sawi a ni.
ZPM tawngkam cheh ang chiah an chungah a tla – MNF
