Zu hi a tha lo, tlemte pawh a tha lo

Ni tina zu a tawk chauh tia tlemte chauh in chu lung tan a tha zawk tih chu doctor tena zawhna tlanglawn an tawn zin ber pawl tia sawi a ni a. Zu a tawk chauha tlemte in mihring taksa tan a tha tia sawina hmasa ber chu kum 1926 a tihchhuah American biologist Raymond Pearl-an a patient case history behchhana a ziah atanga lar tan a ni.
Zu in chu – in miah loh atanga in nasa te mihringa an dam khawchhuah theih dan chu J-shaped curve angin a lantir a. He J-curve hmang hian zu in lo leh in tlem em em te chu (tipping point J hmangin vei lamah a lantir a) chung mi leh (J-point dinglam) te survival rate chu a hniam zawk a, chutih laiin zu, a tawk chauha in (modest) te chu an survival rate a sang zawk a ti. He zirchianna hian a tawk chauha zu in chu taksa tana a tha tih ngaihdan a siam ta vak mai a ni. He mi hnu pawh hian J-shaped curve zirchianna hrang hrangah moderate alcohol consumption chu a tha ti lam hawi zawnga sawi a ni zui ta zel a ni.
Mahse zawhna pawimawh tak awm reng chu: Eng vangin nge zu, license neia zawrhchhuah, kum tina mi maktaduai tel khawvel hmun tina nunna chhattu chu a tawk chauha in te an dam thatna chhan? tih chu a ni a. Scientists te chuan hei hi zirchiang zuiin a chhanna an hmu ta a – heart condition chikhat ischemic heart disease (IHD) tih, lunga thisen petu thisen zam tihzim niin chu chuan muscle damage siamin zu a tawk chauha in (moderate) chuan thisen pekluhna a tichak lo zawk tih an hmuchhuak ta a ni. Moderate alcohol hman chuan IHD a titlem a nih chuan a chhan a awm tur a ni, an ti a.
Maastricht University, Netherlands-a doctor rualte chuan zirchiangin a chhanna an hmu ta a ni. March 2023 khan an zirchianna Cardiovascular Diabetology-a an tihchhuahah modest alcohol consumption (zu a tawk chauha in) chuan heart muscle a thisen pekna thisen zam tereuhte microvascular dysfunction or MVD chu a titlem/tihniam a, chu chu IHD thlentu ber a ni tih an hmuchhuak ta a ni. Hei mai bakah hian Massachusetts General Hospital-a researcher te chuan heart health hmasawnna awmna chhan chu modest alcohol avangin brain network-a stress tlem vang an ti zui bawk.
Mahse scientists rualte chuan J-curve zirchianna tin chu an enfiah leh ta vek hnuah mi tin tena an enkan thil an hmuchhuak ta thung a. An zirchianna JAMA Network a March 2023 a an tihchhuahah chuan moderate alcohol health benefit awmna chhan chu chung mite chu an nunphung a hrisel vang an ti. Heng lifestyle hrisel tak nei te ni lovah chuan moderate alcohol chuan heart disease nasa zawk a thlen an ti a, an in tam poh leh a hlauhawm tial tial a ni mai an ti thung a. He an thil hmuhchhuah hi zirchianna hrang hrang nen pawha inmil niin zu in tlem tena heart disease an neih theihna tlemna chhan chu an lifestyle inthlak vang tia sawiin ‘zu in tlem hrim hrim chu a nawlpuia hriselna atana tihmakmawh a ni’ an ti.
MGH zirchiannaa zu in chuan brain-stress titlemin heart health tana a tha tih pawh, zu hrim hrim chuan cancer leh cancer kaihhnawih avanga nunna chan theihna a tipung an ti zui bawk a. Chu chu JAMA Netwrok tena zirchianna an neih kumina tihchhuah chuan nemnghet bawkin ‘zu in tlem hrim hrim chuan thihna lakah min chhanhim hauh lo’ an ti bawk a, zu hrim hrim chu mipa te aiin hmeichhiate tan a la pawi zawk bawk an ti.
Scientific Report-a zirchanna dang tihchhuahah chuan ‘modest alcool use’ chuan mihring dam chen kum khat a pawtsei thei tih a ni a, mahse chu kumkhat chhung chuan lu leh nghawng cancer neih theihna chu a let hnihin a tipung thung a, ‘modest’ aia nasaa zu in phei chuan kum sarih nun tihtawi theihna an ti bawk.
Zu eng pawh tlemte pawh ni se brain cell tichhiain brain volume a tihniam a. Zu chuan thluakin thil thar a zir tur tihniamin thluak kal dan tibuaiin hriatrengna leh reasoning a tichhia a ni. Zu chuan immune system tihniam bawkin hei vang hian natna lakah a dinhmun chauin a bik takin bacteria hlauhawm Klebsiella pneumonia lung tissue eiraltu a ngam lo hle bawk a. Nature-a Chinese study tihchhuahah pawh zu in chuan mipaah natna awm thei 200 vel thlen theihna a tisang a ti a. Zu hrim hrim chu cancer chi hrang hrang nena inzawmna nei tih finfiah ni bawkin hei vang hian WHO chuan mihring hrisel nan zu eng tin mah a him lo an ti reng a ni.