Zu leh ruihhlo khawihna hmun zawng zawng thenfai theih ni rih lo mah se, Vaivakawn huamchhung bik tal chu thenfai a ni dawn tih Excise & Narcotics minister Lalnghinglova Hmar chuan a sawi.
Aizawl West-II bialtu MLA Lalnghinglova Hmar hian Thawhtanni khan a bial chhung Vaivakawn khawtlang hruaitute leh Excise & Narcotics Department hotute nen Vaivakawn huamchhunga zu leh ruihhlo do dan tur leh a zuarte tihrem dan ngaihtuahin a thutkhawm pui a. Vaivakawn atangin local council, YMA Branch, MUP, MHIP, Vaivakawn Siamtha Pawl hruaitute an tel. Excise & Narcotics secretary Lalramsanga Sailo, commissioner Z Lalhmangaiha leh senior officer dangte an tel bawk.
Minister chuan a bial chhunga Vaivakawn hmun thenkhat, tun thlenga zu leh ruihhlo chelekna hmun pakhat la ni chu veiin, a tihrem dan tur ngaihtuahin he inrawnkhawmna hi ko a ni tih a sawi a. “Dan loa zu leh ruihhlo khawihna hmun hrang hrang chu thian famkim thei rih lo mah ila, Vaivakawn huamchhung bik chu kan thianfai dawn,” a ti.
Zu leh ruihhlo do chu huphurh loin, inthuruala khawtlangin an beih phawt chhuan an hlawhtling ngei dawn tih sawiin, Vaivakawn huamchhunga zu leh ruihhllo khawih thinte pawh khawtlang leh sawrkar thenfai ngai loa mahnia an lo inthiarfihlim a finthlak zawk dawn tih a sawi bawk.
Vaivakawn khawtlang hruaitute hian zu leh ruihhlo donaa hma an lo lak dan sawiin, hmalak zel dan tura rawtna an sawiho a ni.
Zu leh ruihhloah Vaivakawn huamchhung thenfai tum
