Ruihhlo a hluar a, vanduaithlak takin ruihhlo vanga nunna chan pawh an pung. Kuminah ruihhlo vangin mi 60 chuangin nunna an chan tawh a, 2005 hnua ruihhlo vanga nunna chan an tam ber kum a ni der tawh.
Mizoram Excise & Narcotics (MEN) department-in an chhinchhiah danin, November ni 9 thleng khan kuminah mi 67-in nunna an chan tawh. 2020-ah khan kum tluanin ruihhlo vanga nunna chan zat kha 67 a ni a, 2005 hnuah 2020 kha ruihhlo vanga nunna chan an tam ber kum a ni thin; kuminah November ni 9 thlengin 2020 kum tluana nunna chan zat khan nunna an chan tawh.
Kumina nunna chante hi mipa 56 leh hmeichhia 11 an ni a, an vanduaipuiah hian heroin a tel vek. Pakhat chu heroin leh alprazolam vang a ni a, mi dang 66-te pawh heroin leh ruihhlo dang vang a ni.
MEN department chhinchhiahna enin, 1984-ah Mizoramah ruihhlo vanga nunna chan an awm tan a, 2023 November ni 9 thlengin mi 1803, mipa 1587 leh hmeichhia 216-in nunna an chan tawh.
Mizoramin ruihhlo a tuar nasat hmasak chu spasmo proxyvon/parvon spas a ni a, he damdawi hi a chhuah lohna a rei tawh na a, damdawi ruihhlovah nunna lan nasa bertu a la ni. MEN department-in an chhinchhiah danin, hetiang damdawi vang hian mi 1161-in nunna an chan tawh. Heroin hi tun hnai kum 10 vel chhunga hluar a ni a, heroin vang hian mi 233-in nunna an chan tawh.
2005 hnua ruihhlo vanga nunna chan zat
2005-ah 42
2006-ah 22
2007-ah 29
2008-ah 11
2009-ah 28
2010-ah 16
2011-ah 12
2012-ah 45
2013-ah 37
2014-ah 38
2015-ah 27
2016-ah 59
2017-ah 65
2018-ah 56
2019-ah 55
2020-ah 67
2021-ah 47
2022-ah 43