British-hoin rimawi lama chawimawina sanga an neih Brit Awards nomination chu kumin atan an puang leh ta a, RAYE langsar berin nomination pasarih a nei a, artist of the year, best new artist, pop act, R&B act, Mastercard album of the year (My 21st Century Blues) leh song of the year-ah nomination pahnih- “Escapism.,” leh “Prada,” te a nei. Heti hian RAYE hi he award an sem tan, 1977 atangin tum khata artist nomination-a lang hnem ber a ni a, a hmaa he record siamtu chu Gorillaz (2002), Craig David (2001) leh Robie Williams (1999) te niin, anni pathum hian tum khatah nomination paruk theuh an nei.
RAYE chuan kumina nomination pasarih lai a nei thei chu lawmawm a tih thu sawiin, “BRIT school zirlai ka nia BRITs-ah engtikah emaw chuan la lang ve ila tia duhthu ka lo sam thin te kha ka hrechhuak a. Lawm avanga awm ngaihna hre loin, engtin nge hetiang hi a lo thlen theih tiin mak tiin ka ka hau ringawt mai a ni,” a ti.
RAYE, kum 26, hi 070 Shake a thawhpuina ‘Escapism.’ hla avangin khawvelin a hmelhriat a, he hla hi Billboard Hot 100-ah pawh No.22 a kai pha a, a album My 21st Century Blues pawh Billboard 200 (albums) chart-ah a lang pha nghe nghe a ni.
Central Cee leh J Hus ten nomination pali ve ve neiin RAYE an dawt a, Dua Lipa-i’n nomination pathum- artist of the year, pop act leh song of the year a nei a, ani hi March ni 2-a award semnaah a perform dawn tih an puang tawh a, February ni 4-a sem tur Grammy Awards-ah pawh a perform dawn tih an puang tawh bawk.
Kumin Brit nomination-ah hian The Rollung Stones an rawn lang ve leh ta nawlh mai a, kum 10 chuang he award nomination-a an lan tawh loh hnuah kumin hian alternative/rock act category-ah nominate an ni.
2024 Brit Awards nomination-ah RAYE langsar ber
