2024 CMA Awards semnaah thlarau a che
USA President inthlanah sakhuana la thutak leh duh fir zawk Republican candidate Donald Trump-a’n hnehna a chang a, America-a Kristianna tluchhe mek chu tundinin a awm leh dawn te pawh a ni mah na, music award semnaah Pathian hla sain, mittui tla te pawh hmuh tur an awm leh ta tlat mai. Chutirualin country star te hi chu popstar te ai chuan sakhuanaah pawh Kristianna la thutak zawk an ni ve reng reng bawk a. Chutihrualin hetiang taka award semnaa thlarau lam boruak nei hi hriat tur a vang ve êm a ni!
Bridgestone Arena, Nashville chu Jelly Roll leh Brooks & Dunn ten minute eng emawti chhung chu biak inah an chantir a ni deuh ber a, rau zetin ‘Believe’ tih hla, 2024 CMA Awards semnaah an rawn sa a, country star rual leh mipui pungkhawm zingah an zai laia hnukulh avanga mittui lo hru zauh zauh hmuh tur an awm a, a tawpah Jelly Roll-a’n chunglam kawkin, “Lalpa ka hmangaih che,” a ti zui zat bawk.
Kix Brooks-a’n piano tumin, Ronnie Dunn leh Jelly Roll nen an zaiho a, orchestra nen an ri ruai ruai a, an album ‘Reboot II’ a hla, gospel hla ‘Believe’ chu rau zetin an sa a, Dunn leh Jelly aw mawi leh ril raih mai, inchawih mawi bawk si chuan arena chhunga mipui awm te a hneh hle a, an zai lai hian chunglamin a rawn uap a ni ngei ang tih theih turin boruak a awm tlat.
2024 CMA Awards semnaah thlarau a che
