2026 Fifa World Cup thlirlet leh zuai ang

2026 Fifa World Cup thlirlet leh zuai ang
Lionel Messi leh Cristiano Ronaldo atangin Cape Verde lasi thawnthu, VAR chelek dan sawisep kai leh fan-te hriat zui hlawh tur thil tam tak thlenna Fifa tournament lian kan thlirliam takah khan hawikir leh zawi zawi teh ang.
Team 48 inelna hmasaber World Cup-ah khan ram tam zawk an inlan thei ta a, match khelh pawh hun hmasa lam aiin a tam a, hun remchang pawh hun liamta aiin a inhawng zau ta zawk a nih kha.
Fans tan ruai ropui
Thla khat lai mai kha North America khawmualpui chuan common language-ah football a hmang a; New York kawtthler lun mangkheng atangin Mexico beach rang ruai, chu ta tangin Canada ram park dai leh reh riai thlengin football chu mite titi ber a ni a; he khawmualpuia an khawpuite chuan football kutpui an chen a.
Fans hmai rang riai ruai zi nuai nuai karah hun tawp dawna goal thun lawmin mikhual theuh theuh inkuah ta lawp lawp hmuh tur awmin, zinkawng thui tak tak zawhtu khualzinte chu a tawpa nui ta leh tap chunga kirlehte an insulpel zut zut mai!
Serthlum rawng thuam inbel chunga Dutch fans-in Brazil fans thimpui (sea of yellow) hmaa lam an han thai tak takte kha a hmuhnawm e…
Japanese supporter-te an fel leh bik a, an pawlte inkhelh zawha stadium chhung hnawk an han thian leh bik thlapte khan khawvel hi an tihahdam!
Khawvel thinlung hnehtu thliarkar kha…
Champion zui ta Spain meuh pawhin an hneh zawh loh awmchhun leh an tana fiahna tak tak tling kan hmuh chhun Cape Verde khan Round of 32-ah finalists Argentina meuh pawh an barakhaih teuh hle nain chu em chu an puitlin zo ta lo a nih kha.
Debutants Cape Verde goal-a ding kum 40 mi Vozinha pawh kha kumin World Cup larpui ber a ni hial awm e.
Mipui maktaduai chanve awrh chenna he thliakar rem te reuh te hian an bultanna inkhelah Spain an han draw nghal pang a, Messi hoa inlan Argentina meuh pawh extra time khelhpuiin, tun tournament-a match thlir manhlaberte zinga mi ni taah khan a tawpah 3-2-in tlawm mah se zan khat thil thua global star rawn ni ta an goalkeeper Vozinha chuan a vawi khat World Cup khelhnaah sulhnu ropui a hnutchhiah.
Chuai mawh old master pahnih
Argentine superstar Lionel Messi chuan kum 39 tlin tawh hnuah pawh chuai tih reng a la nei lo a, 2026 Fifa World Cup khelh zawh takah khan match sarihah goal riat thunin a team chu final luhpui leh mah se a hmawrbawkna inkhelah Spain an ngam ngang lo a ni!
Khawvelin Messi avangin Argentina lam an hawi lo thei lo a, Fifa leh a bikin an president Infantino pawhin he South American team hi an hmingchhiatpui hial a nih kha!
Texas-ah chuan uicho takngial pawhin Messi shirt an ha fur a; Czech Republic-ah chuan supporter pakhatin a car rawng chu Argentine legend hlimthlain a thlak hial a ni.
Kum 41 mi ni tawh chungin Cristiano Ronaldo pawhin world champion nih a han tum leh ngial a, Messi ang bawka tum ruk ngawt World Cup a khel tling chung pawhin a tum ram a thleng zo ta lo a ni.
A team chu pre-quarter final a paltlangpui zawh loh avangin a trophy cabinet-ah ‘trophy’ pakhat hmuh tur a awm ve dawn ta lo a ni!
Chhuan thar kan hmu
Spain rawlthar duhawm Lamine Yamal chuan hliam a thawhsan hnuah World Cup ngei mai chu a thiamzia phochhuahna’n a rawn hmang thei ta a; England pawhin Jude Bellingham-ah an zawn an hmu a tih theih ang a; France captain Kylian Mbappe pawhin khawvela attacker hlauhawm ber a nihna khawvel a hriattir nawn leh!
Norway lamah hnah thar Erling Haaland chuan defender rual hrilhhaiin a siam fo a; Harry Kane pawh England tan a vul chhunzawm a; Michael Olise kha France chhuanthar eng ber pawl a ni ngei ang.
Sawi hlawh ber technology
Tuntum zet chu VAR an chelek na salh salh hle mai a, he technology avang hian goal tawh hnu an sut a, penalty a hring chhuak a, penalty sutlehna hmanrua a ni a, stadium hrang hrang leh mahni in luma inkhel entute zingah he VAR teivet hian ngaihdan a tiphir nasa a; Egypt phei chuan Argentina laka an tlawm chhanah thil dang kawh an nei lo!
Croatia pawhin Portugal lakah he technology hi an tahpui tlawk tlawk a; Switzerland player Breel Embolo chu tournament chhunga VAR larpui berte zinga pakhat niin, a yellow card chu he khawl hian red card-ah a chantir a, inhnialna lian a chawkchhuak!
VAR hlawkpui bera ngaih chu 2022 champion Argentina kha niin, tih-elna tawngkam lar tak ‘VARgentina’ tih chu social media lamah a rawn lar phah ta hluai a nih kha!
Football hian technology mamawhna a nei ngei ang a, mahse, khawl inrawlhna tam zawk hi chuan entu mipuite a hneh hran lo niin a lang!
Football-a timeout kha!
Volleyball leh infiamna dang thenkhatah chuan timeout tihte a lar a, sawisel pawh a hlawh hran lo a, mahse, kumin World Cup lai first leh second half-a tui tlakchham palh venna break tawi (hydration break) zet kha chuan lawm a hlawh fahran lo!
Kha thil an kalpui chhan kha nipui khawlumin player-te a sawpchauh hlauhthawnna vang niin Fifa lam chuan an sawi taknain mipui ngaihdan a thuhmun thei tlat lo!
Television broadcaster-te tana sumdawnna huang zauhna hmanrua anga ngaihna chu Fifa insawifiahna pawhin a benghniam hlei thei lo a; inkhel kal tluang lai lai en tui laklawh lai tihbuai a ni thin kha player hluite ngei ngei pawhin an sawisel bawng bawng a, kum 2026 hnu lamah chuan hydration break hi kan hmu zui tawh kher lo mai thei!
Fans sum phawrh a sang
Fifa lamin inkhel en man an tuk san vawi vawi em avangin stadium a ruah hiai huai hlauhthawnna piang bawk mah se a tawpah chuan fans ipte zawk a ruak leh ta tho a!
Group-stage ticket-te kha official-a an bituk dan chuan US dollar 140 atanga USD 2,700 chuang man niin, final ticket-ho khan USD 8,600 a hawlh pha hial a; chutih laiin ticket lei tawhte kha hralhchhawn leh a nasa a, chu chu thenkhatin sum siamna atan an lo hmang ve mek bawk a, resale ticket engemawzat chu dollar maktaduai khat mante zu ni a maw le!
Politik nena thlunzawm World Cup!
Kumin World Cup laia sawihlawh berte zinga pakhat chu US president Donald Trump leh Fifa inkungkaihna kha a ni!
Football hi he sport-a politik inrawlh intiduh lo berte zinga pakhat ni bawk mah se Trump-a duhdan angin US player Folarin Balogun-a automatic red card-te chu an han hnukdawk leh vel kha a ni a; Belgium last 16 game-a American red card hmuh kha Trump chuan mimal takin Fifa president Gianni Infantino hnenah ennawn leh turin a ngiat a, a hlawhtling chiang vai vai teh e!
Kha thil leh Fifa-in Argentina leh Messi a vulh bika ngaihna piang avang khan Fifa hmai a mawk phah nasa a, Infantino pawhin duh lotu leh dodaltu a ngaih phah hluai a, Fifa president thar thaln tur boruak pawh kumin World Cup avang khan a ‘hot’ zual phah ngei ang!