Nimin khan International Olympic Committee member-te chuan vote hmangin 2028 Los Angeles Olympic Games-a infiamna thunluh thar tur an chingfel a, kum 1900 hnu lama a vawikhatna atan kum 2028 khian Olympic-ah cricket khelh a ni dawn a, cricket khelh dan chi hrang pathum zinga a reilober chi T20 hmanga intihsiak hi kalpui tur a ni.
Cricket bakah Olympic programme-a tel thar tur zingah hian flag football, squash, lacrosse leh baseball/softball-te pawh Los Angeles bik atan pawm a ni ve bawk.
Thawhtannia Mumbai khuaa IOC session-ah hian infiamna tarlan takte dodal zawng hian palai pahnih chiahin vote an thlak a, chumi awmzia chu hneh takin infiamna pangate hi LA Games atan thlanchhuah an ni.
Sawichian chiah la awm lo mah se kum 2028 Olympic-ah hian Twenty20 men’s leh women’s tournament buatsaih a nih a rinawm.
Olympic and Paralympic Games 2028 sports director Niccolo Campriani chuan khawvela infiamna lar ber dawttu tiin cricket a sawi a, chutiang game pawm a ni ta chu a thlangtu committee lam pawh an phur hle niawmin a sawi.
2008 Beijing Games leh London 2012-a shooting ve ve atanga gold medal awrhtu Italian Campriani hian cricket khelh dan tawi ber chi an thlang chu hnehna chhinchhiahtlak a nih thu a tarlang tel.
Sports an pawmtharte khelh tur zat leh chumi atana infiam-mite ‘quota’ neih zat tur chu la final leh tur a ni.
Tarlan tawh thin angin, Olympic thlengtu ram hian Games an thlen kum atan Olympic programme-a tel tur infiamna thenkhat an thlang thiang a, a tlangpuiin an ramin an uar leh an medal beiseinate an thlang thin.
United States hi June 2024-ah West Indies nen men’s T20 World Cup inthlentawm tur an ni a, LA Games-ah pawh hian US leilungah cricket a mikhual lo zui tura ngaih a ni!
2028 Games-ah cricket tel dawn
