Ruatfela Nu
Thuhma:
‘20 MW Vankal Solar Park’ hi Vankal khaw bul lawk, Vankal khaw ram neih tha ber zinga mi, ram rem tha em em, acre 144 a zau, Vankal khaw in-za nufain lo atana an kum thum bawh a ni. Mizorama solar power hrim hrim, Rooftop solar telin, Vankal solar park-in a nghawng a chhiat em avangin thapui thawhin 2022 atangin kan chhui a: Vankal solar park tlawhin tum 3 kan kal tawh a. RTI dan hmangin Vankal solar park bik chipchiar takin ka zawt tawh a. RTI dan hmang zelin Mizoram chhunga solar power plant bun fel tawh, bun tum mek leh Rooftop solar (PM Suryaghar Muft Bijili Yojana) ka zawt mek bawk a. PM Rooftop solar hnuaia Mizoram sawrkarin a do letna, nuai 400-a 353 lakhs a pek chhuah tawha a bang nuai 47 te pawh ka zawng pah dek dek a, ka la hmu lo. Solar power chungchang RTI dan hmanga ka zawh chhannate ka kawl tha khiau a, mamawh in awm emaw? Vankal solar park hi sum siamna remchang atana bun ni berin ka hria a. Tunah hian Vankal khua inkaw-kipa solar park-a hna pek an tiamah mi 11 chauh pek an ni a, hna pek an tiamdan hi tawgkama (verbal) sawi a nih vangin khin let theih an ni si lo. A chanchin sawi zel phawt ang:
1. Vankal solar park hi kum 2018 bawr chhova ruahmanna siam a ni a. He solar park siam nan hian Rs 21.07 crores sen a ni a. Ministry of New & Renewable Energy (MNRE) atangin subsidy Rs 4 crores hmuh niin, vantlang sum (public fund( Rs 17.07 crores sen a ni bawk.
2. Vankal solar park-ah hian vai compny pahnih, M/s Sunfree Northeast Renewable Energy Pvt Ltd (15 MW) leh M/s ATA Renewable P4 Pvt Ltd (5 MW) ten Solar Plant an rawn din a. Heng solar plant te hian 18th March, 2023-ah zawh fel (commercial operation) a ni. Heng company pahnihte nen hian kum 25 atan power leina tur power purchase agreement sign a ni a, power unit khat zelah Rs 3.94 pek an ni.
3. Vankal Solar Park din tura ruahmanna siam tan vel lai hian, central sawrkar company lian, NTPC Ltd chuan 24/8/2018 ah Engineer-in-Chief, Power & Electricity Dept, Govt of Mizoram lehkha rawn thawnin solar power unit khat zelah Rs 2.66 in an rawn zawrh a. Chu solar power chu kum 2020-21 atanga hmuh tan tur niin, power sale agreement hmanga inpek tur a ni. Heng power atan hian inter-state transmission loss leh transmission charge pek ngai lo a ni a. RPO atana hman theih a ni bawk a. Hei hi khatih hun lai pawha thil tha lutuk a nih avangin Mizoram mamawh tam thei ang ber lei tura thurawn pawh chutih laia power secretary leh E-in-C te pek a ni. Amaherawh chu thurawn hi ngaih pawimawh a ni lo a, bawhzui pawh a ni lo niin a lang a. Hetiang tariff based competitive bidding kal tlanga power leiah hian, a leitu leh hralhtute tan a lang loa hlawkna tel tur a awm loh avangin power leina man pawh a tlawm tlangpui reng a ni.
4. NTPC Ltd hnen atanga Rs 2.66 per unit a solar power lei duh lo a, Vankal solar park siam a Rs 21.07 crores sen bakah, he solar park a solar plant dintu vai company pahnihte hnen atanga power Rs 3.94 per unit a lei leh si avanga heng power lei hun, kum 25 chhunga power hmangtu mipui ten power hman man kan chawi belh tur hi cheng nuai 9000 vel a ni dawn a. Hei bakah hian solar park siam nana vantlang sum cheng nuai 1707 sen leh solar park-in a luah ram tha tak atanga kum 25 chhunga buh leh thlai thar chhuah tur man chhut phei chuan hlawk lo tak a ni. Mimal thenkhat hlawkpui an awm a nih pawhin mipui ten kan chawi belh hi a tam takzet a ni.
5. Kha u le, tun hnaiah RTI dan hmanga ka dil chhuah hi bel chiang teh u: Vankal solar park-a power transformer a chhiat avanga 31.5.2025 atanga 1.2.2026 chhunga power unit khat pawh mipui hman tura kan dawng lo chunga power man kan pek hi cheng nuai 530/- (Rs 530,00,000) chuang a ni a. A rapthlak a ni ringawt!!! ‘Vai company pahnihte an thurualpuite hlawkna tur en rana agreement hi siam a ni a tih loh theih loh.
6. Thla sarih chuang zet mai power transformer siam that loha a awm reng pawh hi a fel lo takzet a. Thil fel tawk lo lian tak a awm nia ngaih loh theih a ni lo. Power Transformer hi tun thlenga siam that a la nih loh chuan eng tikah nge siam that a nih dawn tih ka zawt a ni.
7. 2003 atangin ziak hnathawh nan computer ka hman achin, kawlphethaa Mizoram intodelh hi ka mimal tak pawhin ka duh ve em em a, PM Pu Modi zarah ‘Rooftop Solar’ ah kan intodelh thei tih ka hria a, mimal, office, sikul leh biak in chung atangin ni zung chakna hmang tangkai ila tih hi duhthusam mangphan ram a ni. He mi letling thawk hian lo leh huan atana neih tlak, Agriculture land-a solar plant bun ka duh lo bur!!! Vankal solar park tawnhriat atangin a tiha tih ngei loh a ni si a.