Tun hnaiah Mizoram atangin Meitei 600 chuang an chhuak a, Nilaini leh Ningani-ah chuan chhuak an awm tawh lo nia hriat a ni.Mizoram Police te’n Mizoram atanga chhuak Meitei hi an chhinchhiah a, Nilaini leh Ningani-ah chuan chhuak an awm an hre lo.
Police-te chhinchhiah danin, July ni 22, kar hmasa Inrinni khan Lengpui Airport leh Vairengte paltlangin mi 74 an chhuak a, Chawlhni-ah mi 304 an chhuak. NEEPCO hnuaia thawk mi 42 te’n Saipum leh Saiphai paltlangin Mizoram an chhuahsan bawk. Thawhtanni leh Thawhlehni-ah mi 220 an chhuak leh a, Mizoram atanga chhuak hi an vaiin mi 636 an ni.
Police te chuan Meitei hi a chhuak tur an chhuak tawh nia a lan thu an sawi a, Mizoramah kuttuar an awm loh thu leh an him thu te, police te’n a theih ang anga an vil thu te an sawi.
May ni 3-a Manipur-a Zo hnahthlakte leh Meitei kara buaina a chhuah khan Mizoram atangin Meitei engemaw zat an chhuak a, mahse rei vak lovah Mizoramah an kir leh. Chawlhkar liam ta tawp lam atang khan mi 600 an chhuak leh a ni.
All Mizoram Manipuri Association hruaitute chuan Mizoramah an pawl member 2500 vel an awm tih an sawi a, mahse an pawla tel lo Meitei an awm thu te, a tak takah chuan hei aia tam hi an nih an rin thu te an sawi.
Mizoram atanga buai tirha chhuakte kha Mizorama la awm rei lo an ni tlangpui a, an chhungte’n an ngaihtuah avanga haw an nih thu te, tun hnaia chhuakah hi chuan an chhungte’n an ngaihtuah vang bakah, a ralmuang lo ang tih hlauh vanga chhuak te pawh an awm thu te an sawi.
600 vel chhuah hnuah Meitei chhuak tawh lo
