8th Schedule-a Mizo tawng dah hi tribal nihna a bona tur a ni lo – Lalduhoma

8th Schedule-a Mizo tawng dah
hi tribal nihna a bona tur a ni lo
– Lalduhoma
India danpui Eight Schedule-a Mizo tawng dah chu tribal kan nihna a bo phahna tur a ni lo tih chief minister Lalduhoma chuan a sawi.
Nilainia Prof. Laltluangliana Khiangte lehkhabu pahnih a tlangzarhnaah chief minister chuan, Eighth Schedule huanga Mizo tawng telh a nih theihnan hma an la mek a. Sawrkar laipuiah Eight Schedule-a Mizo tawng khung ve theihna tur tha tak an thehlut tih sawiin, Eight Schedule huanga Mizo tawng dahluh chu tribal nihna a bona tur a ni lo tih a sawi.
Mizo literature chu hnam dang tawngin a tam thei ang ber lehlin a pawimawh tih a sawi a. Sap tawng, Hindi, Bengali, a theih chuan khawvela tawng lian dang dang pawha letlingin, internet khawvelah dah chhuah ni zel se, kan ram leh kan hnam phochhuahna tha tak an ni anga, Mizo tawng humhalhna a ni bawk tih a sawi a ni.
Mizo tawng chu internet-a dahluh tam a tul tih chief minister hian a sawi. “Mizo tawng thumal leh chumi tlukpui Sap tawng leh Hindi (a lehlinna) kan neih tam khan AI thiamna hmanga Mizo tawnga hna kan thawhna lamah min tanpui a. Hnamdangten Mizo tawng anmahni tawnga an lo lehlin zung zung theihnan a tanpui thin. Kum 2022 atangin Google translate chuan Mizo tawng a senglut ve tawh a, tunah chuan Google leh language based AI hi Mizo tawngin kan hmang ve thei tawh. Hei hi khawvel changkang zela kan mamawh em em thil a ni,” a ti.
Mizo ziakmite nena hun an lo hman ho tawhnaah a ngaimawh zawng thil a lo sawi ve thin a. Tuna lehkhabu an tlangzarh pahnihah pawh hian a ngaimawh thil, a lo sawi ve fo thin tihhlawhtlinna zing ami a ni tih a sawi bawk.
Lehkhabu tlangzarh tak hi ziakmi hrang hrangin Prof. Laltluangliana Khiangte chanchin an ziah dahkhawmna lehkhabu “Zawhzawzo Val” (FestsChrift – An damlaia mithiamte chawimawina lehkhabu) leh Prof. Laltluangliana Khiangte ziak lehkhabu dang pahnih – Lalzika leh Vanthangi, Sap tawnga ziak leh “Teaching of Mizo Language in Secondary School” Dr. Lalramliana nena Sap tawnga an ziah (co-author) a ni a. Khualzahawm Mizoram University vice chancellor Prof. Dibakar Chandra Deka chuan “Pasaltha Khuangchera” bu, Bengali tawnga ziah a tlangzarh bawk.