A chung berah lehkhabu leh Vana Pa ngaisangtu

Kar hmasa lamah HSLC result a chhuak a, a chung bera mi kha lehkhabu leh Vana Pa ngaisangtu a ni; lehkhabu leh Vana Pa nunin a kaihruai thin.
HSLC-a pakhatna hi PC Lalthakimi a ni a, a naupan lai atanga lehkhabu ngaina, chhiar chhiar mai a ni. Vawiin thlengin a la chhiar a, “A awm awm hi ka chhiar mai,” a ti.
“Naupan tet atangin lehkhabu hi ka chhiar a, kum li kum nga vel ka nih lai atangin ka chhiar tawh. Lehkhabu hi ka ngaihlu a, ka tangkaipui bawk,” tiin a sawi.
A naupan laiin naupang thawnthu lar “Heidi” tih bu Mizo tawnga leh a chhiar a, tun thlengin ngaihnawm a la ti. Hmeichhe naupang Heidi nunin a rilru a hneh thu sawiin, “A nun khan min inspire, mi dang a puih duhna rilru kha, mi dang tana a inpekna kha ka ngaisang lutuk,” a ti.
Mizo lehkhabu leh English lehkhabu a chhiar a, thawnthu a chhiar nasa. Mi ropuite chanchin a chhiar nasa bawk a, mi chanchin a chhiar tawhah APJ Abdul Kalam-a chanchin ngaihnawm a ti ber.
Bible a ngaihlu a, lehkha a zir dawnin a chhiar ziah, mut dawnah a chhiar thin bawk. “Bible leh ‘Heidi’ te hi ka lehkhabu duh ber ti ila a dik ang,” a ti.
“Rilru hah lai, exam laia rilru hah lai te hian Bible hi han chhiar ila, a hahdam huai huai theih,” a ti a, a thiante pawh an Bible chang duh a zawt thin a, chung chu chhiar ve a duh thin.
Vana Pa a ngaisang a, a nunin a hneh. “Pawl 3 kan nih laiin Vana Pa chanchin hi kan zir a, chuta tang chuan ka ngaisang nghal,” a ti.
“A tlawmngaihna ka ngaisang a. Baka, mi thinchhia a ni a, mi zaidam ni tura a in-control thei kha ka ngaisang,” a ti bawk.
Mizo pasaltha dangte pawh a ngaisang a, mahse Vana Pa tluka ngaihsan chu a nei lo. “Pasaltha dangte pawh ka ngaisang, mahse Vana Pa hi chu ka dah sang a, ani tluka min hneh hi an awm lo ang,” a ti.
Lehkhabu chhiar hi ni tin nunah leh zirnaah a hlawkpui tih a sawi a, “Hriatna a tizau a, tawngkam hman tur te ka hriat phah a. Sentence construction-ah min pui a, exam-naah pawh hei tangkaipui a, thil han ziah chiah hian ka lehkhabu chhiar kha ka hlawkpui thin,” a ti.
A zirlaiah pawh lehkhabu dang a chhiar thin hi a hlawkpui thu a sawi a, a hriatthiam phah thin thu leh, English-ah hma a sawn phah thu te sawiin, “English lehkhabu ka chhiar hian ka chhiar liam puat lo a, a awmzia ka hriat loh lai te hi ka chhinchhiah a, hriatthiam ka tum thin a, English-ah hma ka sawn phah thin,” a ti.