RK Dawla
Mb 9366095658
1. 2024 kumthar leh Sawrkar thar kan nei ta a. Hun liam ta leh kumhluia kan tawnhriat leh hnathawhte khan kumtharah hian nasa zawkin min tuaihriam sela. Kan tihsualten tumruhna thar min siamin kan tih-thatten chakna thar min pe sela. Kan damchhung kumte hi a rei lamah ni lovin, a hman tangkai tam lamah teh tur zawk a ni tih hi kuthnathawktu leh an thawhchhuah eitu zawng zawngin hre thar leh ila. Khawvel tha zawk, mihring tha zawk ni turin Pathianin he kumtharah hian he thuziak chhiartute zawng zawng min buatsaih theuh rawh se.
2. Kan Mizoram chhunga kan eitur tam tak intodelh kan ngai a. Ram dang leh state dang mamawh phuhruksak kan ngai bawk thin. Engpawhnise, ramchhunga kan eitur tharte hi hriselna atâna sâwtpui theih ngei a nih theih nan a nawlpui hian organic farming kan hmelhriat a tul takzet a. Ramdang, a bikin foreign lama thawnchhuah tur phei chu, man to leh class sâng tak a nih theih nân kawng khat chiah kan nei – organically produced. Tunah chuan mamawh hnaivai phuhruk turin a rem dan danin thlai kan ching a. Hmun zau lo tê-ah hun rei lo tê atân sum chang thlai chin hlâwk tum te, insengso tlem leh hahdam thei ang bera kumhlun thlai buaipui ang chi kan la nih tlangpui avângin, phai vaiho tihdan zul zuiin chemical leitha leh damdawi kan hmang nasa sâwt hle.
3. Bazara kan eitur hmuh zawng zawng deuhthaw hi test mumal paltlang lo, export quality ni lêm lo an nih tlangpui avangin, mipuite hian fimkhur nachâng kan hre lutuk lo niin a lang a. Kan ei leh ina fimkhur nachâng kan hriat loh em avang hian kan la tuar fê thei a, kan tuar reng tawh zawk mai thei bawk. Tin, thar tam lam (quantity) aiin thar that lam (quality) ngai pawimawh turin inelna (competition) kan la nei pha lutuk lo bawk, ramchhung market bikah chuan. Hei hian organic lamah tan lâk nachâng min hriattir har deuh bawk niin a lang. Tin, kan bawlhhlawh paih duh dan atang hian kan ei leh in tur leh environment kan la thlir pha lutuk lo tih chu a chiang thawkhatin a hriat bawk.
4. Khawvel lo danglam zelah hian organic farmer-te kan hlu chho nasa hle a. Mahsela, organic tak taka thil kalpui tur chuan smart a ngai êm êm thung. Kan kumin article series khuh-hawn nân heti hian sawi ta ila – organic dan hmanga thlai ching hlawhtling tur chuan eng leitha leh organic damdawi nge kan hman ang tih aia pawimawh hmasa kha a awm a. Chu chu kan thlai chinna leilung nihphung leh a chhehvel hriat hmasak kha a ni. A mawl thei ang berin sawi ta ila, Nitrogen awmna leitha engzatnge ka pêk dawn tih aiin kha leilungah khan Nitrogen awmsa engzatnge awm hriat hmasak kha a ni. Laboratory test kan neih theih loh pawhin thil to lo awm tawhsa leh khalai leilunga kan leitha lo hman tawh dan atang leh kan thlai chin tur azirin eng ang vela Nitrogen awm nge tih kha kan suangtuah thiam a ngai a nih chu. Tin, khalai area kha rannung hnawksak (insect pest) enge tam zual thin, chungho rawn inlar tur chu engtianga lo inven chi nge tih nên chhût hmasak a ngai fo. Thil chîk peih leh zir peih a tul êm êm, organic farming-ah chuan. Chutih rualin organic farming-a experience nei tha leh inzir peih tân chuan, chemical farmer-te buaina tam tak ang kha kan buai ve lova, a hahdam lel a. Environment leh khalai ram potential mila chêt kan la thiam a nih phei chuan, pest & disease tam tak kha mut-mawh hnar-mawha neih a ngai lo êm êm thung. Chuvangin, tunlai khawvel atân farmer smart tak, râwn tlâk leh tlo ni tur chuan ORGANIC FARMING lamah beng kan chhit ngun a ngai êm êm a ni.