RK Dawla
Mb 9366095658
1. September thla tawp kan thleng ta a. Thlasik hmahruai, favang vanglai kan thleng chho mêk a. Hetih lai hian kum 10 kal taa boruak nuam tak ni thin, tlêma zosâng deuhte pawh a lum uap ta viau mai a. Hei hian khawvel pumpui lum chakzia, mi naran pawhin kan hriatthiam theih turin a tarlang âwm e. Kum 10 lo awm leh turah hi chuan, kan nunphung pawh nasa takin a danglamin, kan thlai chin leh enkawl dan kalhmang pawh a danglam tawh hle ngei ang. Mithiamte chuan leilunga hrik chi hrang hrang (soil microbiome) awmdan hian, a chung lama thilto leh rannung-te a nghawng nasat theih thu an sawi thin a. Mita kan hmuh theih maiah pawh ramngaw leh huan chhungah chuan, thilnung kan hmuh thinte pawh nasa takin a danglam tih kan hriat hi. Mita kan hmuh theih danglamnate hi kan hmuh theih loh lei hrik awmdan (intamhleih dan, chi hrang tam dan)-in an rawn thlen kan tih tawh kha. Kan hmuh theih rannung leh thilto a danglam chuan, hmuh theih loha danglam phei chu nasa tak a ni thin. Lei hrikte hmu thei tur chuan, enlenna (microscope) a ngai a. Mita kan hmuh theiha danglamna ai mah hian enlenna hmanga han en chuan, thlawhbua leh ramchang lei pawh hi a lo danglam nasa zawk daih thin. Tichuan, boruak leh leilung lumzawng a lo danglam hian, lei hnawn dan leh thilto awmdan a danglam ta zel a. Chuvangin, khua a lum chhoh zel chuan, lei hrik population leh diversity-ah danglamna nasa tak thlengin, hei hian thlai-ah danglamna nasa tak a la rawn thlen thei dawn a ni. Entirnan – Favang tantirha solanaceae (tomato, bawkbawn, hmarcha etc) phunte chu, a kung vuai natna (bacterial blight) lakah an him lo zual a. Mahsela, favang tawp lama phun erawh an vuai nêp thei hle. Hei hi a chhan chu, leilung temperature sâng hlekah khan bacteria blight natna hrik kha an tam duh thin, an duh ang lumna an dawn theih avangin.
2. Hetianga khawvel boruak a danglam chhoh zel avang hian, farmer-te pawhin nisa tuar tam lo zawnga hnathawh te, tui mamawh tlem deuh thlai chin te, khawlum leh zuva laka chhel deuh thlaite kan la uar chhoh a pawimawh ang. Tin, Pathianin leilung a siam dan phung zulzuia thlai chin (Natural/Organic farming) hi kan innghahna tur a ni chho dawn bawk. Nature do zawnga farming kalpui hi buaina a tam a, a hlawk chhung a rei lova, ecosystem tihchhiatna a nih thin avangin tun dinhmunah hian India sawrkar laipui pawh a lu a hai hle a. Kawng hrang hranga hma la-in, organic farming promote nân sum pawh vaibelchhe tam tak a dah chho hial rêng a ni. Sik leh sa lo danglam chho zel mila farming kalpui tura mithiamte luhaizia hi mi tam tak chuan kan hrethiam lo mai thei e. Mahsela, thleng thut ni lo, zawi zawia thleng a nih vang hian mi naran tân chuan hriatthiam a har ve deuh thin a. Tin, farmer-te hi khawhawi zau lutuk kan ni lo thin bawk nên, kan hnaah kan buai lutuk avangin khawvel inher danglam ngaihven hman kan ni lo ve fo bawk. Engpawhnise, dan hriat loh hi chhuanlam a tling lo ang bawkin, kan khawvel sik leh sa inthlak man thiam loh hi chhuanlam a tling lova. Ni tinin, thla tinin, kum têlin a nghawng kan tuar chho zel dawn a ni. Kan lo hriatthiam a, a theih ang anga kan lo inpuahchah lâwk erawh, tihtur dik tak a ni thung.
3. Global warming vang hian keini Mizoram ai chuan India ram phaizawlte hi an derdêp zawk a. A bikin thei kumhlun bikah phei chuan tlangramin potential kan nei sâng chho telh telh ang. Chuvang chuan, tun atan mai ni lo, kum 10/20 lo awm leh tur ngaihtuahin tunah hian kan farming system pawh kan buaipui a hun takzet e, Mizo Kristiante hian. India phaite hi surplus production nei turin a tha tâwk a ni mai thei e; mahsela quality production nei tur chuan thil harsa ve tak a ni thin. Pollution vang te, mihring tam lutuk vang te leh farmer-te knowledge hniam vangte-in. Heng zawng zawng ngaihtuah hian Mizote hian hmakhua kan nei êng êm êm a, theihtawp kan chhuah a hun tak meuh meuh e.