Delhi chief minister, AAP hruaitu, Atishi chuan February 5-a assembly inthlan tur atana Kalkaji biala chuh turin Thawhlehni khan a hming a pe lut a. A hma ni chiah khan Model Code of Conduct a bawhchhia nia puhin a lakah FIR thehluh a ni.
Atishi-i hi BJP candidate Ramesh Bidhuri leh Congress candidate Alka Lamba te nen Kalkaji bialah hian an inkhing dawn a. Inthlan hnuhnung berah khan BJP candidate Dharambir Singh chu 10% vote-a hmu tamin a hneh.
“Makar Sankranti-ah tak hming ka pe lut a, a hmaa Kalkaji mipuiten min lo duhsak tawh ang ngeiin nakin atan pawh ka dawn leh ngei ka beisei,” a ti.
A laka FIR thehluh a nih chungchangah Atishi chuan, “Ram pumin Parvesh Verma-a’n pawisa a sem tih kan hria a. Hmeichhiaten TV-ah lotus an hmeh chuan Rs 1,100 an dawng dawn tih an sawi a. A hnuah health camp-ah tarmit a sem leh tih pawh Twitter-ah a tar lang a. Kidwai Nagar hmingin puanthan leh mut puan a sem leh bawk a. Election Commission chuan heng thil hi Model Code of Conduct bawhchhiatnaah an ngai lo,” a ti.
September 22-a lak luh a nih khan kum 43 mi, Atishi hi Delhi-a hmeichhe chief minister pathumna niin Sushma Swaraj leh Sheila Dikshit hnung a zui a. Hetih laia chief minister, AAP chief Arvind Kejriwal chu excise policy thubuaia lung in a tan hnua a chhuahah a bân avangin a aiah a lut.
Assembly inthlan campaign nana Pathiannia sum thawh duhte tan hun a hawn atanga darkar ruk lek chhungin Atishi hian Rs. nuai 15 chuang a hmu hman a. Rs nuai 40 hmuh tlin hman a tum.
A laka thubuai thehluttu, Lamba-i pawhin Thawhlehni vek khan a hming a pe ve a. Kum 49 mi hian kum 2013 khan Congress chhuahsanin Aam Aadmi Party a zawm a. Kum hnih hnuah Delhi assembly inthlanah hian Chandni Chowk bial atangin a tling a. Kum 2019 khan chhuahsan lehin Congress-ah bawk a kir leh.
Delhi-ah hian February 5-ah mipuiin vote an thlak ang a, February 8-ah chhiar zui a ni ang.
A laka FIR thehluh tukah Delhi CM-in inthlan
