A manager-puite thlawp hlawh Ten Hag

A manager-puite thlawp hlawh Ten Hag
Thawhtannia Manchester United-in an ban tak Erik ten Hag chu Premier League manager-te’n a thlavang an hauh tliar tliar a, khawng zawka kirleh turin duhsakna an hlan hlawm.
Pathianni khan West Ham khelmualah 1-2-in Red Devils an tlawm a, a tukah Dutchman kum 54 mi hi Old Trafford office pui ber atangin an petchhuak a, Premier League table-a 14-na an luah duai tawh avangin United hotute’n an head coach lakah rinna an nghat zui zel ngam ta lo a ni.
Ten Hag lainattu leh a thlavang hauhtu langsar zingah Manchester City manager Pep Guardiola leh Liverpool boss Arne Slot telin, Guardiola chuan, “Pawi ka tihpui khawp mai. Ani nen hian inzawmna tha tak nei kan ni.
“Football manager-te hi eizawnna huang hrang hrang zinga mite’n ban mai theiha an ngaih zingah telin, architect, doctor leh zirtirtu han tih angte hi chu ban mai mai tura tinzawn an ni lo a, keini hna nena chauha inzawm a ni a, kan pawm mai a ngai.
“Duhsakna tha ber ka hlan a, khawng zawka lokir leh turin a chhuak ta phawt a ni.
“Kan hna hi result-a innghat a ni tih hrechiangtu a ni a, kan result a tha tawk lo a nih chuan ban mai tur kan ni a, he mi chungchang hi keimah leh keimah ka inhrilh fo thin a, kei ngei pawh hi chu dinhmun atang chuan ka him bik lo,” a ti.
Liverpool manager Slot chuan a chipui ban a nih thu hriat chu hrehawm a tih thu sawi chungin Guardiola ngaihdan a tawmpui thu a sawi a, Ten Hag chu hlawhtling zawka a kirleh ngei a beisei thu a sawi.
Arsenal manager Mikel Arteta pawhin Ten Hag-a’n a hna a chan chu pawi a tihpui thu sawi chungin a hringnuna hun thar a chuankai leh tur atan duhsakna a hlan.
Karlaihal Carabao Cup fixture khelh hma chiaha head coach an ban hnuah United chuan interim manager atan Ruud van Nistelrooy an ruat nghal a, nizan EFL Cup fourth-round match-ah Leicester City a hmachhawn nghal a, mahse, Dutchman Nistelrooy hi Old Trafford club chuan a ngheta rawih zui an tum lo.
Portuguese club Sporting tarlan danin Manchester United chuan an head coach Ruben Amorim chhuhsak tumin contract tawp hmaa leichhuah theihna thuthlung an dah euro maktaduai 10 (£8.3m) pek an inhuam tih an tarlang.