Footballer lar Lallianzuala Chhangte hian footballer lar ni chungin lehkha a la zir a, peih lo chung pawhin, a mood-a awm lo chung pawhin zirlaibu a keu thin. Thil dang pawh a mood-a awm lo chunga tih thin a nei – a mood-a a awm loh lai pawhin Bible a chhiar thin.
A thianpa Lalengmawia Ralte, footballer lar ve bawk pawhin peih lo chung pawhin lehkha a zir thin a, Bible a chhiar thin bawk.
“Bible hi chu ka inchhawp deuh reng,” Lallianzuala Chhangte, LZ-a tia koh, international footballer chuan a ti a, ngaihnawm ti takin chhiar thin mah se ngaihnawm tihin a daih lo a, rilru-ah thil dang a awm chang te pawh a awm. Chutiang chang pawh chuan a chhiar thin; “A mood-a awm lo chung pawhin ka chhiar thin,” a ti.
International hockey player Lalremsiami Zote hian a ‘mood’-a a awm loh lai pawhin Bible a chhiar thin a, chumi a lo hriatin LZ-a pawhin titha a tiin, Bible chhiar tura a mood-a a awm loh lai pawha amah nawr kaltu pakhat a ni.
Inkhela zin kual thin a ni a, a zinnaah Bible a keng thin. “Bible hi ka zinnaah ka keng ziah,” a ti a, Bible a ken zel chhan leh a zin loh lai pawha thahnemngai taka a chhiar thin chhan a sawi chu “Pathian thu hi chu a nung. A nung – lehkhabu dang nena khaikhin rual a ni lo,” tih a ni.
LZ-a hian Pathian thu hi a tuipui a, footballer lar ni chunga lehkha la zir peih a ni mai lo, theology pawh a zir – online hmangin a zir a, Christian online course a lei thlap.
Rinna humhimna lam (apologetic) a tui a, “Apologetic lam hi ka tui a, zir hi tul ka ti a,” tiin hemi chungchang hi a sawi.
Lehkhabu dang pawh a chhiar thin a, season khat chhungin lehkhabu 40 atanga 50 vel chu a lei thin ang. Hetah pawh hian peih lo chunga a beih a ngai!
“Lehkhabu hi season khatah 40-50 vel chu ka lakhawm ve thin a, ka phak ang tawkin ka chhiar thin. A tam zawk chu ka chhiar luih, chhiar ka duh vanga ka chhiar a ni a. Lehkhabu hi peih lo chung pawha chhiar a ngai,” a ti. “Thil hriat belh ka chak avangin lehkhabu ka chhiar thin,” a ti bawk.
A thianpa Lalengmawia Ralte, Apuia tia koh pawhin Bible a ngaina a, a la naupan tehlul nen, vawi thum a chhiar chhuak tawh. Bible hi a chhiar chhuah bakah mahni duh lai keuin a chhiar thin bawk.
Apuia pawh hian lehkha a la zir a, naupan lai atanga lehkhazir nuam ti mi a ni lo tih a sawi chungin, zir a duh vangin a la zir. “Thil reng reng hi, a nuam chin ringawtah duhtawk tur a ni lo a, a nuam chin bak hi thlen a ngai,” a ti.
A nuam chin chauh ni lovin
