World Cup 2026 khelh mekah Group A a mite chu ningani zing khan an inching fel a, inelna thlengtu Mexico chuan hnehna chang vek chungin last 32 an lut. Mexico tan hian hranghlui si nghak Guillermo Ochoa a inlan a. World Cup 2026 ah Mexico player naupang ber Gilberto Mora a inlan bawk.
An match hmasa pahnihah hnehna chang zawn a, group champion ni chiang tawh Mexico hian an khelmual ropui Azteca Stadium-ah Czechia an hmachhawn. Group champion an nih chian tawh vangin coach Javier Aguirre chuan a player tha panga lai hahdamtir a, kum naupang leh khel tlem zawkte khelhna hun tha pe. Mexico tana bul tan zingah kum 17 leh ni 253 a upa Gilberto Mora a tel. Mora hi Mexico tan World Cup a bul tan thei naupang ber a ni a. World Cup-a bul tan phak zinga naupan lamah parukna a ni tel bawk.
Mexico B team leh Czechia te an inhnehtawk viau a, goal pawh a lut lawk thei lo. Inkhel hmuhnawm pangngai takah goal lut a awm theih loh reng hnuin Mateo Chávez chuan second half tantirh minute 55-naah hmahruaina goal a thun.
Hmahruaina goal an thun hnuin Mexico an phur a, an ram mipui puihna tha tak nen thothang tha taka inlan zuiin Julián Quiñones chuan minute 61-naah an goal hnihna a thun a, an hmahruaina a tizau. Goal hnih an thun hnuin goal lut a han deuh vang vang. Goal a luh belh theih lawk loh hnuin Álvaro Fidalgo chuan hun pek belh minute 90’+4 naah an goal thumna thunin an chakna a nemnghet a, Czechia lakah 3-0 ngawta hnehna changin point thum an hmuh belh.
Khelmual ropui Azteca Stadium a Czechia an hmachhawn tum hian hranghlui si nghak Guillermo Ochoa chuan minute 78-naah mualchhung a lut a, World Cup 2026-ah a inlan. Kum li dana hriat hlawh thar leh hin Ochoa hian World Cup 2006, 2010, 2014, 2018, 2022 leh 2026 ah te Mexico squad-ah hmun a chang vek a. Lionel Messi leh Cristiano Ronaldo te huangah awmin World Cup vawi ruka inlan thei a ni. Czechia an hneh hnuin Ochoa hi a player pui ten chawimawiin an vawr nghe nghe a ni.
Group A champion Mexico hian last 32-ah Group C/E/F/H/I a pathumna zinga tu emaw ber an hmachhawn zui leh dawn a, last 16 luh theihna chance tha tak an neia ngaih a ni. Mexico an chak vek laiin Czechia erawh an chak zo lo vek a, beisei phak lo tak chungin an tla.
A thlengtu Mexico an chak vek
