A tumkhat nan Ukraine leh North Korea sipaite inkap
Ukraine sorkar thupuangtu chuan a tum khat nan Ukraine sipaite chu North Korea sipaite nen an inkap niin a sawi a, defence minister Rustem Umerov chuan heng NKorea sipaite hi Russia pui tura tirhluhte ngei an nih thu a sawi.
A hmain Ukraine hotupa Volodymyr Zelensky chuan khawthlang ramte chu North Korea do pui turin a lo ngen tawh a, an chhanlet vat loh chuan khawvel buaina hmahruai a nih theih thu a lo sawi tawh a ni.
Seoul chuan heng sipaite hi indona hmunah tak tak chuan an luh ve an rin loh thu an sawi a, an ram spy te hriat dan chuan Russia pui tur hian North Korea hian sipai tam tak tir mah se, indona tualzawlah tak tak chuan an awm tir lo niin an sawi. Tun tuma Ukraine nena inkapte pawh hi North Korea sipai tlemte, a hmatawnga awm zeuhte an nih an rin thu an sawi zui bawk.
Tun hnai khan South Korea intelligence leh US intelligence bakah NATO chuan Russia indonaah North Korea sipaite chu pui turin an tel ngei tih an finfiah thu an lo sawi tawh a, hemi chungchang hi Moscow leh Pyongyang chuan engmah a la sawi ve duh lo thung.
Ukraine sawi danin North Korea sipaite hian an ke pen tihma zelin, tunah chuan an sipai 11,000 chuangte chuan Kursk ramri an thleng tawh niin an sawi a ni.
A tumkhat nan Ukraine leh North Korea sipaite inkap
