Thlasik khua a vawt a, vawt vin tuk chu a la ni lo. A vawh dan tur tawk velin a vawt a, kum dang aia vawt emaw kum dang aia vawt lo emaw a ni rih lo.
State Meteorological Centre-a an chhinchhiah danin, thla liam ta November-ah khan a vawh ber laiin Aizawl hi 15°C a ni a, 15°C hi a ni fo; ni 23, 24, 25, 26, 29 leh 30-ahte khan 15°C a tehnain a kawk.
15°C hi November thlaa Aizawl vawh dan tur tawk velah ngaih a ni a, 2024-ah pawh khan November thlaa a vawh ber laiin 15°C a ni. 2023 November-ah a vawh ber laiin 16°C a ni a, 2022 November-ah pawh a vawh ber laiin 16°C a ni.
Kuminah December-ah pawh 15°C aia a vawh lai a la awm lo a, ni 2-ah khan a vawh ber laiin 15°C a kawk. Nikum khan December thlaah a vawh ber laiin 11°C a ni a, chu chu ni 12-ah a ni.
15°C hi vawt tak chu a ni lo a, mahse a tehnaah 15°C a kawh niin a lum ber lai a lum vak lo a nih chuan, chumi ni chu mihring tan a vawt thei. December ni 2-ah pawh a vawh ber laiin 15°C a ni a, hemi nia a lum ber laiin 21°C niin, 21°C hi a lum lo, chuvangin hemi ni hi vawt tih viau theih a ni ve tho.
Mizoram thlasikah November leh December hi khaw vawh thla ni tho mah se a vawh vin tuk lai chu a ni lo a, January hi a vawh ber lai a ni thin.
Tun hnai kum thum kum li vel enin Mizoram thlasik hi a rei telh telh niin a lang a, February leh March-ah khua a la lum lo thin. November pawh a vawt vak lo a nih chuan, khua a vawt har telh telh ang a, hetiang zela a kal a nih chuan February leh March vel a vawt telh telh bawk dawn a ni ang tih ngaihdan te pawh a awm.
A vawh dan tur tawk velin khua a vawt
