Aam Aadmi Party (AAP) leh an hruaitu helte inkara politic-a buaina chu a la kal zel a, lehlam lehlam hian Thawhlehni hian Rashtrapati Bhavan-ah kalin president an hmu dawn.
Rajya Sabha MP Raghav Chadha-a bakah MP dang paruk, tun hnaia AAP atanga chhuaka BJP-a lut tate chu chawhma dar 10:40-ah President Droupadi Murmu-i hmuh phalna pek an ni a. MP rualte hian Punjab sorkarin state rorel leh thuneihna kalphung a hman dik loh nia sawi chungchanga an lungawi lohna an thlen rin a ni a, politic-a phuba lakna kalpui mek zingah anmahni beiah an puh a ni.
MP helte hian AAP atanga an chhuah hnuah leh BJP an zawm hnuah an chunga thuneitute an chunga an chet dan chu politic thila tih a nih thu an thlen a rinawm.
A lehlamah chuan AAP hruaitute pawhin an MP helten BJP nena an insuih zawm dan a dik loh tiin hma an la ve bawk a. Party hian Rajya Sabha Secretariat hnenah an MP helten an party an chhuahsan leh BJP nena an inzawm danah dik lo a awm tih thlenin action lak an dil.
AAP hruaitute hian vantlang hriatah helho hi ‘Punjab phatsantu’ tiin an sawi a, hei hian politic-a inbeihna a tisosang hle a ni.
A hmain Punjab Chief Minister Bhagwant Mann-a pawhin he thubuai chungchangah hian President Murmu-i hmuh a lo dil tawh a. Mann-a hian president Murmu hi a MLA 89-te nen inhmuh a duh laiin amah chauh hi Thawhlehni chhun dar 12:00 hmuh phalna pek a ni.
AAP hruaitute chuan an ngaimawh an sawi chhuah beisei a ni a, chung zingah chuan langtlang leh dik bakah Punjab mipuite thuneihna chungchang pawh an thlen ngei rin a ni.
Hetih lai hian AAP Rajya Sabha MP zinga BJP-a kal ta zinga mi, MP Sandeep Pathak-a chuan Punjab Police-ten a lakag FIR an ziak lut nia sawi chungchangah thuthar lakhawmtute thubuai kaihhnawihah hian thuneitute atanga engmah hriattirna a dawn loh thu a sawi.
“Nimin atang khan television channel hrang hrangah Punjab-ah FIR pahnih ka lakah thehluh a ni tih an lo puang a. Heng FIR chungchangah hian tih dan pangngai emaw, pangngai lo emaw pawhin engmah ka la dawng lo. Ka hmuh hnuah chauh a kimin ka chhang thei ang,” a ti.
Pathak-a chuan a awmna AAP chhuahsan tura a thutlukna chu mi mal thil tum aiin ngaihdan inan loh vang a nih thu a sawi.
Tar lan tawh thin angin Punjab-a rorel lai, AAP Rajya Sabha MP pasarih chuan an party chhuahsanin BJP-ah lawm luh an ni a. Rorelna ina an party member hmun thuma thena hmun hnih an tlin avangin party awmna an thlak hian dan a bawhchhe lo va; mahse, an kalsan tak party chuan chhan hrang hrang avangin an chet dan hi dik lo tiin an la umzui zel a ni.
AAP aiawh leh MP hel aiawhten a hranin president hmu dawn
