AAP an tlin chuan Sisodia-a a deputy CM leh dawn

AAP an tlin chuan Sisodia-a a deputy CM leh dawn
Aam Aadmi Party (AAP) chief Arvind Kejriwal chuan February 5-a Delhi assembly inthlanah an party-in hnehna an chang leh a nih chuan Manish Sisodia chu deputy chief minister a ni leh dawn tih a sawi.
Kejriwal-a hian Pathianni tlaia Sisodia-a dinna, Jangpura biala vantlang inkhawma hun a hmannaah a puang a ni.
“Deputy chief minister a ni leh dawn a, ani nen hian nangni pawh deputy chief minister in ni vek dawn a ni,” tiin Kejriwal-a hian mipuite chu a hrilh a, Sisodia chu vote turin a sawm.
Sisodia-a hi AAP sorkar hun liam mai tawh turah hian Kejriwal-a thachhangdawltu a ni thin a, March, 2023 khan Delhi Liquor Excise Policy thubuai avangin man a ni.
Term kal mekah hian Patparganj MLA a ni a, tun tumah hian Jangpura bialah hian a ding dawn thung.
Kejriwal-a hian BJP MLA-te chu tun term kal mekah hian an biala hmasawnna an thlen loh avangin a dem a. “Inthlan hnuhnung berah khan bial riatah BJP MLA pariat an tling a, an tlinna bialah hian hna engmah an thawk lo. Heng mi pariatte hian an bial chu hremhmunah an chhuah a, mipuite hian hetiang tihsual hi in thlentir tawh tur a ni lo,” a ti.
Sisodia-a thiltih sawiin Kejriwal chuan, “Manish Sisodia nen hian sorkar sikulte chu kan fate hma hun atan tha takah kan chhuah a. Tunah hian BJP chuan an sorkar a nih chuan sorkar sikul khar vek turin a ti ve mek thung a. Tute nge in thlan zawk dawn – ‘AAP – sorkar sikul dintu’ nge ‘BJP – a khartu’ zawk?” a ti.
Jangpura biala vantlang inkhawmah hian Sisodia-a chuan an sorkar a nih chuan a tha zawnga danglamna a thlen dawn tih a sawi a. “Jangpura-ah hian min thlang tling a nih chuan kan unaupa leh farnute zawng zawng hi deputy chief minister in ni vek dawn a. Tute mahin mipuite tana ka thawhna tur hi min dal lo vang,” a ti.
AAP hian Jangpura bialah hian hmabak hautak tak an nei dawn thung a. BJP-in Tarvinder Singh Marwah an dintir a, Congress-in Farhad Suri an vawrh chhuak ve thung a, pa lian ve ve an ni.
Delhi assembly inthlan hi February 5-ah neih tur a ni a, February 8-ah vote chhiar a ni ang.