November 24 zan atanga tan Baptist Church of Mizoram (BCM) rorelna sang ber dawttu Area Baptist Council (ABC) inkhawmpui chu Pathianni zan khan neih zawh a ni.
Inrinni khan rorel inkhawm neih a ni a, ABC Executive Committee thute bakah Pastor bial atanga thu ngaihtuah tur lutte, ABC kaltlanga nakum Assembly-a thlen tura chhawpchhuahte ngaihtuah niin, nikum ABC inkhawmpui leh tun ABC inkhawmpui inkara Kohhran Upa leh rawngbawltu boralte sunna hun hman a ni.
Pathianni chawhmaah Kohhran Upa nemngheh inkhawm neih a ni a, upa 206 nemngheh an ni. Chawhnu inkhawmah Lalpa Zanriah Sakramen kil ho a ni a. Pathianni zanah Pathian biak inkhawm neih a ni. Inkhawmpui chhung hian ABC tinah thupui hran theuh hman a ni.
ABC Inkhawmpui hi kum 1971 khan BCM Planning Commission rel angin Area Church Council (ACC) Inkhawmpui tih hming puin ACC 5 a awm a. Kum 1981 khan BCM Planning Commission-in Area Baptist Council (ABC) Inkhawmpui tiin a thlak a ni.
Tunah hian Baptist Church of Mizoram (BCM) hnuaiah Pastor bial 92 awmin, Area Baptist Council (ABC) 17 a awm a. Tualchhung kohhran 680-ah member 1,76,404 an awm.
ABC inkhawmpuiah kohhran upa 206 nemngheh thar awm
