Kum kalta chhunga Anti-Corruption Bureau Mizoram-in corruption case 35-a a chhuizawh atangin inhnamhnawih mi 112 chu court-in thiam loh a chantir.
Anti-Corruption Bureau Mizoram Annual Report hmasaber, ACB Annual Report 2025- 2026 chu Ningani khan chief minister Lalduhoma’n a tlangzarh a. Report-a a lan danin, kum 2025- 2026 chhung khan eirukna kaihhnawihah complaint 17 a dawng a. Chu’ng zinga 15-ah chuan preliminary enquiry neiin regular case 6 a ziaklut. Kum 2025- 2026 chhung khan preliminary enquiry hrim hrim hi, kum hmasa lam ami pawh telin 14 an ti zo a, regular case 7 an chingfel hman.
Kum 16 chhung (2010- 2026) khan ACB Mizoram-in corruption case 35-a chargesheet atangin corruption-a inhnamhnawih mi 112 chu Special Court Prevention of Corruption Act chuan thiamloh chantirin hremna a pe a ni.
Chief minister chuan, ACB-in a vawikhatna atana annual report a buatsaih thei chu a lawmawm tih sawiin, annual report hian sawrkar hnathawkten rinawm leh dik taka an mawhphurhna an hlen a pawimawh a, sum leh pai enkawlnaah dik taka thil tih a tulzia min hrilh thar dawn tih a sawi a ni.
“Corruption hi rorelna tha siamna daltu leh ram hmasawnna tichhetu a ni a. Corruption do hi agency pakhat mawhphurhna chauh niloin, mipui zawng zawng leh sawrkar hnathawk zawng zawng mawhphurhna a ni zawk tih kan hriat tlan a ngai,” a ti. Hlemhletna do tura chak tak hma lak a tul avangin sawrkar chuan ACB leh Mizoram Lokayukta a thuamchak a, a thawktute pawh lo intuaihriam zel turin an beisei tih a sawi a ni.
ACB-in corruption case 35 a chhuiah thiam loh chang 112
