Chief minister ni mek Lalduhoma chuan MNF leh India sawrkarin inremna thuthlung an duannaah a tel ve ni anga zirlaite hmaa a sawi thin chu a dik loa, a tel lo tih MNF hruaitu Tawnluia chuan a sawi.
Thawhtannia Mizo Hnam Run-a inkhawmah MNF National Core Committee member Tawnluia chuan, MNF leh India sawrkar inremna thuthlung bung leh chang duannaah Pu Lalduhoma a tel ve loa, a tel zawk chu Mizoram larsap-a kum thum lo awm tawh Swaraj Kaushal (L) a ni tih a sawi.
“Pu Swaraj Kaushal kha Pu Laldenga ngaisangtu tak niin, India sawrkar nen kan inbiaknaah dan (legal) anga nasa taka min puitu leh legal adviser a ni a; 1984 November-ah inbiak tan a ni a. 1986 June 30 ah remna ziah a ni. Pu Duhoma’n London-a draft duannaah ka tel ve, a tih hi dawt a ni a, tel ve nise amah leh Pu Denga khan an sawi ve ve ang.
Dik chu dik, dik lo chu dik lo ni mai rawh se,” a ti.
Deputy chief minister hlui Tawnluia hian, kum 1988-ah Maumual ramah MNF rammu ho tan house site plan siam a ni a, a hnuah MNF sawrkar thoin re-survey an ti a, ZPM-in an kutkawih anga an sawi chu a dik lo tih a sawi.
“MNF sawrkar khan kawngpui tam tak siamin, Police tam tak kan la a, Vairengte-a Assam nen kan buainaah pawh a hlawkna kan hmu. ZPM sawrkar chu thu mumal nei lo, kalpaha thutlukna siam mai mai thin an ni,” a ti.
Accord duannaah Lalduhoma a tel lo – Tawnluia
