Accredited Wetland City-ah Indore leh Udaipur tel ve ta
Indore leh Udaipur chu India khawpui zinga Ramsar Convention on Wetlands-in ‘accredited wetland city’ a tih zinga tel hmasa ber an ni ta a. Prime Minister Narendra Modi-a pawhin Wetland Accredited Cities-a tel thar 31 zinga a tel ve hi a lawmpui thu social media-ah a tar lang.
“He thila tel ve hian tang taka hmasawnna ngialnghet a awmna tura kan beihna a lantir a, khuarel mawina leh khawpui thanna hi a kal dun thei tih a lantir a ni,” tiin a tar lang a. “He list-a tel vena hian mi tin hnenah kan ramah hian ram hring zawk, fai zawk leh khuarel mila khawpui siam duhna lo tuh zel rawh se,” a ti.
Prime minister hian Union Minister Bhupendra Yadav-a’n X-a ‘double joy’ tia a tar lan chu a chhang zui a ni a. Yadav-a hian Modi-a hmathlir, ‘eibara thanna leh khuarel kal dun’ chu a takin a chang tih a sawi a. He thil hian India-in khawpuite tihmasawn chunga khuarel vawnhim a tum tho zia a pho lang niin a tar lang bawk.
Thla tirah khan Ministry of Environment, Forests, and Climate Change (MoEF&CC) chuan India atang hian Wetland City Accreditation (WCA)-a telh turin Madhya Pradesh-a Indore leh Bhopal leh Rajasthan-a Udaipur te chu a thlen a. An pathum hian hetianga telh tura thlen hmasak ber pathum an ni.
Sirpur Lake, Indore-a Ramsar Site chu tui savate tamna hmun niin bird sanctuary-a siam tum mek a ni.
Udaipur hi ram hnawng tak tak panga – Pichola, Fateh Sagar, Rang Sagar, Swaroop Sagar leh Doodh Talai ten an hual a ni ve thung a. “Heng hmun hnawngte hi khawpuia nunphung leh nihna pho langtu a ni,” tiin MoEF&CC-in thu a chhuahah tar lan a ni.
Accredited Wetland City-ah Indore leh Udaipur tel ve ta
