Thingsulthliah Higher Secondary School zirlaite chuan adhoc status-a sawrkarin a hlankai ngenna lehkha kengin Thingsul atanga Aizawl thleng kea kal a, chief minister leh Education minister hnena thehluh an tintuah a. Zirlai nu leh pate pawhin zui an tum.
Thingsulthliah HSS Students’ Union chuan chief minister-in kum 2008-a lumpsum-a hlankai higher secondary school 9 Managing Board chairman-te kianga Council of Minister-in uluk taka an dinhmun an ngaihtuah tur thu a sawi chu lawmawm an tih thu an sawi a. Chutih rualin zirlaite hian Council of Minister thukhawmin an thil ngiat, sawrkarin a lo tiam tawh adhoc -grant-in -aid an rel thluk ngei theih nan hma lak nise; khaw awm dan leh boruak thlir chungin kar tharah hian chief minister leh Education minister hnenah adhoc ngenna lehkha kea Aizawl kala thehluh nise, tiin a rel a ni.
He school-a zirlai nu leh pa September 14-a inhmukhawm chuan zirlaite Aizawl kal niah hian lirthei nei ten thawhchhuah pui a, zirlaite hnungah kal ve nise tiin an rel a. Joint Action Committee for School Upgradation hmalakna atan nu leh paten mahni remchan ang ang sum thawhkhawm nise; JAC chu a hmalama Education minister hmu a, Council of Minister thukhawmin an chungchang an rel hlawhtlin ngei theih nan lamkal intir tura ngen nawn leh nise, an ti.
Tun dinhmunah Thingsulthliah HSS-ah hian zirlai 156 leh thawktu 13 an awm mek a ni.
Adhoc ngiatna lehkha CM pe turin Aizawl kea kal rel
