James Miahlung
Ram danpui (Indian constitution) article 312 atanga rawn zichhuak All India Service (IAS, IPS leh IFoS) te hi ram hmasawnna tura policy duan leh tihpuitlin te, dan leh thupek kenkawh, remchhung venhimna(internal security) te, ramngaw leh nungcha humhalhna kawngah sawrkar kutke ber an ni. State hrang hrangin anmahni pualin All India Service te thachhang dawltu tur state civil service an nei ve bawk.
June ni 5, 2023-a Vanglaini chhuakah Laiu Fachhai chuan UPSC exam-a Mizote tlin theih loh chungchangah a ngaihdan rawn ziakin IAS leh state civil service te tel lova sawrkar a kal theih thu te, UPSC-a Mizote tling lo chu thil pawi lutuk a nih loh thu leh administrative service officer te chelh thin DC post te pawh civil service mi leh sa lo pawhin an chelh theih tur thu a sawi a. Laiu Fachhai thuziah hi azawng azaa hnawl vek tur chu ni lo mah se, hriat fuh tawk loh avanga ngaihdan dik lo erawh a awm ve nual. Sawrkar huang chhungah administration in a tum ber chu ministry/department leh field office ten sawrkar thiltum(objective)te tha taka an hlenchhuah theihna tura department kaihhruai a ni. Administration hian thil pawimawh deuh deuh ken tel a nei a, chungte chu ruahmanna mumal siam(planning), thawhhona tihchak(coordination), a thawktu tur ruahman(staffing) leh a dangte an ni. Entirnan, state sawrkar hnuaiah district administration, health administration, financial administration, land administration, tourism administration, prison administration leh a dang tam tak an awm. District administration pawimawhna
Civil service rau rauah IAS leh state administrative service mi leh sate hi service-a an luh tan tirh; block/sub division leh district level atanga state/central level thlengin administration khawih tura duan an ni. District-a dan leh thu pek kenkawh (law & order administration) te, inthlan (election), khuarel chhiatna(disaster management), sawrkar scheme kalpui dan vil(monitoring), department hrang hrang te inkarah thawhhona(coordination)tihchak leh a dang tam takah DC mawhphurhna a sang hle. General administration piah lamah DC te hian ram inpek(ADC area pawn lamah), ram lak(land acquisition) te, fa lak(adoption), silai leh puak theih thil, ILP leh a dangah quasi-judicial role neiin hna hautak leh hahthlak tak tak an khawih a ni.
Sawrkar programme te tha taka tihhlawhtlin a nih theihna turin department malin a kal theih lova, line department hrang hrangten department dangte nen thawhhona tha an neih a tul a. Coordination hi DC office hnathawh pawimawh berte zinga ami a ni. Chuvangin, he post pawimawh tak mai hi sawrkar hnathawk dangin an chelh ve a rem lo va, administration kengkawh tura a bika duan administrative service mi leh sate chauhin an chelh hi a nih dan tur a ni. British in min awp atanga tun thlengin he system hi kan la chhawm zel a, ram roreltuten a thlakna tur system dang an rawt chhuak a nih ngawt loh chuan tun ang hian kan la kal zel pawh a rinawm. Field experience leh policy duan
A bul thut(district level)a sawrkar programme hrang hrang tihpuitlin kawngah tawnhriat tha tak an neih hnuin administrative service officer te hi state leh central level-ah policy duan leh tihhlawhtlin kawngah a fawng chelhtu an ni chho Ieh a, he an tawnhriat hlu tak avang hian sawkar tan pawh chhenfakawm an ni thei a ni . Thiamna bik nei lo(generalist) IAS ten ministry/department hrang hrangah a key post an chelh kual thin hi sawiseltu awm ve thin mah se department bil rilru pu lo, field a tawnhriat nei, administrative service mi leh sate chu policy duan leh tihhlawhtlin kawngah sawrkar kutke, rinrawl ber an la ni reng tho a. Tunhnaiah chhan hrang hrang avanga IAS officer te central sawrkarah deputation-a chhuak an tlem avangin Department of Personnel & Training (DoPT) pawhin state sawkarte IAS tam zawk central-a kaltir turin a lo nawr hial tawh thin a ni.
Policy duan leh vil (monitoring), department dang nena thawhhona leh administration/establishment thilah buarchuar a awm loh nan ministry hrang hranga post pawimawh Joint Secretary leh a chung lam post te chu IAS leh central service deuh vekin an chelh a. Ministry chang ni lovin autonomous body leh institution pawimawhahte pawh IAS leh civil service dangte dah an ni ve chawk. Entirnan, damdawi in hming thang AIIMS, New Delhi-ah chuan Deputy Director(Administration) chu IAS emaw All India/central service dang emaw ten an chelh a, regulatory body thenkhat RBI, TRAI, SEBI leh a dangahte pawh IAS officer dah an lo ni tawh thin. Heta tanga chiang taka lang chu line department-ah rei tak lo thawk tawh departmental officer te awm ve thin bawk mah se, a lu lam policy framing level-ah chuan sawrkarin IAS leh civil service dangte bak thlan tur a nei chuang lo. Ministry level-ah hian ministry dang dang nena thawhho thiam te, sector/department khat piah lama ngaihtuahna thar nei(out of box thinking)te a pawimawh em avangin subject hrang hranga tawnhriat(cross-sectoral experience) leh administrative /leadership skills nei tha IAS leh civil service dang ten top post an chelh deuh vek hi thil mak a ni hran lo a ni. Civil service leh domain expertise
IAS leh state administrative service te sawrkar kutke an nihna lai kan sawi uar rualin chhenfakawm an nih leh zual theih nan hmasawn tulna lai erawh a awm ve nual. Administrative Reforms Commission (ARC) leh committee hrang hrangin an lo rawt tawh thin angin IAS te hi “generalist” nih tura duan ni mah se, tun aia policy making level-ah an thawh hlawk zawk theih nan department (sector) thenkhatah thiamna thuk zawk (domain expertise) an nei a tul a, heti lam hawi zawnga posting leh transfer kalpui hi tih makmawh a ni.
Department hrang hranga thawk kual theih tura chher ni mahse IAS leh civil officer zingah department pakhata rei tak awm, domain expert anga ngaih theih tur an awm nual a. Junior level atanga a laili(middle level)thleng chu department dang dangah sawnkual ni mahse a chung lam(senior management/policy framing level)ah officer te an tuihna a zirin department pahnih thumah bak sawn kual lo nih se, hei hian subject/sector thenkhatah thiamna thuk zawk a pe thei dawn a ni.
Tin, specialized subject hrang hrang-public policy, public health, development studies, urban development, disaster management leh a dangah te civil service office ten thiamna sang zawk nei phalsak ni se. Medical doctor te harsa lutuk lova post graduate zirna tura study leave pek an ni thin ang bawkin civil service officer zingah administration/governance nena inkaihnawih subject zir chhunzawm peih an awm phawt chuan study leave te pawh tlema phal rai deuh nih se. Tin, civil service ten an hna chelh laiah efficient taka an thawh theih nan Mid career training thlengin tun aiin tihchangtlun theih nise a duhawm hle ang.
A tawp berah chuan sawrkar inrelbawlna, policy duan leh vil zui kawngah chona (governance challenge) a tam chho zel dawn a, a chhawrtu sawrkar leh an rawngbawlsak mipui beisei anga hna an thawh theih nan civil service officer ten tan an lak sauh sauh a tul hle. (Thuziah te hi mimal ngaihdan a ni)