Asia khawmuala ram 24 te football-a an inela AFC Asian Cup 2024 chu zanin dar 9:30 ah khelh tan a ni dawn a. Inkhel hmasa berah inelna thlengtu Qatar leh Lebanon te an inhmachhawn dawn a. Inrinni zanah India chuan champion tura rinkai zinga mi Australia an hmachhawnin bul an tan dawn.
AFC Asia Cup hi football hmanga khawmualpui inelna upa ber dawttu a ni a, kum 1956 atanga khelh tan a ni. Football hmanga khawmual inelna upa ber chu South America khawmualte inelna Copa America a ni a. Copa America hi kum 1916 atanga khelh tan a ni ve thung a. AFC Asian Cup ai hian kum 40 zetin a upa zawk tihna a ni. AFC Asian Cup-ah hian South Korea an champion hmasa ber an ni a. 2024 a inelna thlengtu Qatar hi champion lai an ni thung a. Vawi li champion tawh Japan chu champion ngun ber an ni ve thung.
Zanin a khelh tan tur 18th AFC Asian Cup hi 2023 a khelh tura ruahman a ni a. Inelna thleng tura ruat hmasak China chu Covid 19 hripuiin a tihbuai nasat vangin an thleng thei lova. World Cup 2022 thlengtu Qatar lamah sawn a ni. Qatar hi khua a lum em vangin nipui laia khelh chi a ni lova, CONCACAF Gold Cup khel tura an tlin bawk vangin inelna hi 12 January – 10 February 2024 chhunga neih turin siam rem a ni.
Hneh taka Fifa World Cup lo thleng tawhtu Qatar hian AFC Asian Cup hi khelmual pakuaah a thleng dawn a. Khelmual ropui Lusail Stadium-ah khelh tan a ni ang a. He hmunah vek hian final khelh a ni bawk ang. Champion tumin team 24 an tel a, ram hrang hrangte inbuatsaihna in a vawrtawp a thleng tawh. Inelna hmachhawn tur team 24 zingah Tajikistan chu an vawi khat telna tur a ni a. Kum 56 hnuah Hong Kong an inlan leh nawlh dawn a. kum 2007 hnu lama a vawi khat nan inelna lian hmachhawn turin Indonesia leh Malaysia te an tling kawp ve leh ta nawlh bawk. Inelna hmachhawn turin Iran an tling leh a, Iran hi AFC Asian Cup-a a zawnin vawi 18 an inlanna tur a ni a. Asian Cup khel ngun ber an ni.
Ram hrang hrang 24 te hi group paruk (A-F) ah an inthen a, group khatah team li zel an awm. Group khata pakhatna leh pahnihna bakah pathumna titha zual paliin last 16 an lut leh bawk ang. Chhuak hmasa lama kan lo tarlan tawh angin India chu Group B-ah an awm a, Australia, Uzbekistan leh Syria te nen an awm ho. India tana fehchuak zingah Mizo player pathum; Lalchungnung, Apuia leh Lallianzuala Chhangte te an tel a. India squad-ah Mizo player in hmun pawimawh tak an chang. India player tha bera thlan ni tawh LZ Chhangte chuan AFC Asian Cup a hmachhawn tur chu phurawm a tih thu a lo sawi tawh nghe nghe.
AFC Asian Cup 2024 Group
Group A: Qatar, China, Tajikistan and Lebanon.
Group B: Australia, Uzbekistan, India and Syria.
Group C: Iran, United Arab Emirates, Hong Kong Palestine.
Group D: Japan, Indonesia, Iraq and Vietnam.
Group E : South Korea, Malaysia, Jordan, Bahrain.
Group F: Saudi Arabia, Thailand, Kyrgyzstan, Oman
AFC Asian Cup 2024 Fixture
January 12, Zirtawp zan
Qatar v Lebanon 9:30 PM
January 13, Inrinni zan
Australia v India 5:00 PM China v Tajikistan 8:00 PM Uzbekistan v Syria 11:00 PM
January 14, Pathiani zan
Japan v Vietnam 5:00 PM UAE v Hong Kong 8:00 PM Iran v Palestine 11:00 PM
January 15, Thawh\an zan
South Korea v Bahrain 5:00 PM Indonesia v Iraq 8:00 PM Malaysia v Jordan 11:00 PM
January 16, Thawhleh zan
Thailand v Kyrgyz Republic 8:00 PM
Saudi Arabia v Oman 11:00 PM