Mizoram Football Association leh All India Football Federation tangkawpin March ni 22, 2024 atanga Regional Sports Training Centre, Saidan Kolasib-a a buatsaih tan Asian Football Confederation ‘C’ Diploma Coaching Course Thawhtanni khan khar a ni ta.
Course Instructor Nishant Sindhu (AFC ‘A’) kaihruaina hnuaia ni 11 chhung kalpui C License Course-ah hian Mizoram hmun hrang hrang atangin AIFF ‘D’ Licence coach mi 24 an tel a; Thawhtanni khan theory exam buatsaihin, result an nghak zui ta a ni.
Course kharna hun hmanpuitu MFA treasurer Tuikhuahthanga chuan AIFF leh sponsor Mizoram Youth Commission chungah lawmthu a sawi a, Kolasib District Football Association-in engkim an lo ruahman thinte lawmawm a tihzia a sawi bawk.
Course instructor Nishant Singh chuan he course-a telte chu Mizoram football leh India football hmasawnna thui tak an kutah a awm tih hre reng turin a chah a, C licence an pass a nih chuan a thui thei ang ber thleng tura B License pawh bei zui ngei se a duh thu a tarlang tel.
MFA assistant secretary Lalrawngbawla chuan kum thum kalta chhung khan vawisarih zet MFA license course an buatsaih thu leh tun season tawp hma hian coaching course hnih buatsaih hmabak a la nih cheu thu a sawi ve bawk.
Tuntum C License course-ah hian India international hlui leh I-League club hrang hranga lo khel tawh thin Mizo player thahnem tak an tel a ni.
Tun course-a tel coach-te chuan instructor-in a kaihhruai dan a ngunthlukzia leh khelmual chhung leh pawna football kaihhnawih thiamna tam tak an neih belh avanga hlawkthlak an tihzia an sawichhuak hlawm a ni.
AFC ‘C’ Diploma Coaching Course zo fel
