Aghanistan leh Pakistan inkap, ramri khar

Aghanistan leh Pakistan inkap, ramri khar
Pakistan chuan Pathianni khan Afghanistan nena an inkalpawhna a khar tih thuneituten an sawi a. A hma zan chiahah ram pahnih sipaite hi inkapin Kabul chuan Pakistani sipai 58 an that niin an sawi.
Afghan sipaite hian kar kal ta tir lama Pakistan-in thlawhna hmanga an kah chhan let nan Inrinni zan tlai tawh takah khan Pakistani border post an kap tih an ram defence ministry chuan a sawi a. Pakistan pawhin silai leh laipuiin an kap let tih an sawi.
Afghanistan chuan Pakistani sipai 58 an that tih an sawi a; mahse, engtin nge an mi thah zat an hriat theih tih an sawi lo va. Afghan sipai 20 thi leh hliam an awm bawk tih an sawi tel.
Pakistan atangin engmah sawi a la awm ve lo va, Afghan sipai zingah thi an awm tih chauh an sawi a, a zat erawh an sawi lo.
Ram pahnihte hian border post intihchhiatsakah an inchhal ve ve a. Pakistani venhim hna thawktuten video an dah chhuahah chuan Afghan post an kah chhiat nia a sawi a lang.
Inbeihna hi Pathianni tuka thleng a ni ber tih Pakistani venhim hna thawktuten an sawi a; mahse, Pakistan-a Kurram-ah chuan silai ri hriat tur a la awm zeuh zeuh niin tual chhung thuneitu leh mi chengten an sawi.
Afghanistan-a defence ministry chuan a hmain an beihpui thlak chu zanlaiah an zo tih an sawi ve thung.
Kabul chuan Pathianni khan Qatar leh Saudi Arabia ngenna angin beihpui thlak an titawp tih an sawi a. Arab Gulf ram pahnih hian inbeihna awm chu tha lo an tih thu an sawi ve ve .
“Afghanistan ram chhungah engmah hlauhawm a awm lo,” tiin Taliban sorkar thupuangtu, Zabihullah Mujahid-a chuan Pathianni khan a sawi a. “Islamic Emirate leh Afghanistan mipuiten an ram hi an hum dawn a, chumi tur chuan an beisei zel ang,” a ti.
Mujahid-a hian hmun thenkhatah inbeihna a la awm zeuh zet tih a sawi bawk a. Islamabad chuan Taliban sorkar hian an ram beitu helhote an khawi niin a sawi a, Kabul-in a pha thung.
Pakistan chuan Afghanistan nena an inkalpawhna pui ber pahnih, Torkham leh Chaman chu Pathianni khan an khar tih tual chhung thuneituten an sawi a. A tenau deuh pathum – Kharlachi, Angoor Adda leh Ghulam Khan pawh an khar bawk.
Ramri khar chungchangah hian Kabul-in engmah sawi a la nei lo va. Tuipui atanga luhna nei lo, Afghanistan hi Pakistan nen km 2,600-a thui an inri a ni.
Pakistani-ten thlawhna atanga an kah, Islamabad-in engmah a sawi loh hi Kabul-a Tehreek-e-Taliban Pakistan (TTP) hel pawl hruaitute beihna niin Ningani khan Pakistani venhim hna thawktuten an sawi a, a him em tih hriat a ni lo.
TTP hi Islamabad sorkar paih thlaka Islam dan khauh tak hmanga sorkar din duh an ni a. Mujahid-a chuan Pathianni khan Afghan leilungah TTP fighter tumah an awm lo tih a sawi.