Agriculture minister-in kawm
January 23-25 chhung khan Bangalore-ah International Trade Fair buatsaih niin, organic (chemical fertilizer tel lo) thlai hmanga ei tur chi hrang hrang siamte phochhuah a nih bakah buhtun (millet) chawilarna campaign neih a ni a. Mizoram atangin Agriculture & Farmers Welfare minister PC Vanlalruata pawh a tel.
Minister hian Mizorama vaimim eichhetu rannung (Fall Army Worm) tirem tura state sawrkarin a rawih Indian Council of Agriculture Resource (ICAR) hnuaia National Bureau of Agriculture Insect Resources (NBOAR) hmunpui a tlawh nghal a. Mizorama loneituten harsatna an tawh thin sawhthing tam leh serthlum bawmtu leh eichhetu rannung thlangdar zirchiang turin a sawm. NBOAR hotute hian an ngaihvenin, chona phurawm takah an ngai a, hun remchang hmasa berah Mizoram loneitute harsatna zirchiang tura lokal ngei an tum thu an lo hrilh.
NBOAR hotute hi khuai khawi chungchang pawh sawipuiin, Mizoramah mi zuk thei lo khuai (stingless bee) khawi pun dan tur leh a nursery siama eizawnna tlaka kalpui theihna tur project tha tak duanga Mizoram sawrkar nen thawhdun dan tur a sawipui a. Stingless bee hi a zu a to bakah thlai chi put darh kawngah leh thlai inthlahpunnaah an tangkai hle tih sawi a ni a. Kalphung thar sawrkar hnuaiah khuai khawituten bungthar an kai ngei a beisei awm hle tih minister hian a sawi a ni.
Agriculture minister-in kawm
