Mizoram Agriculture Service Association (MASA) chuan Aizawlah general conference an hmang a. Agriculture & Farmers’ Welfare minister PC Vanlalruata’n a hmanpui.
Minister chuan, MAS officer indaih lohna a nasa hle a, post ruak hnawhkhah a nih theihnan, a tul anga recruitment kalpui zel a tul tih a sawi. MAS officer-te chu an hnathawhna kawngah theihtawp chhuah tur leh, an hna chu farmer-te tana hlawkna tur a ni tih hria a, sawrkar scheme bel taka zirchianga thawk turin a fuih.
Thawhhona kawngah pawh MAS officer-te fakawm a tih thu sawiin, posting chungchangah harsatna siam loa, sawrkarin a dahna apianga awm zel thei turin a chah bawk.
“Kan hnathawhte rawngbawlnaa ngai a, hah bik deuh kan awm a nih pawhin, vui loa Pathianin mipui leh farmer-te tana rawngbawl tura min dahna a ni tih hria in hna kan thawk tur a ni,” PC Vanlalruata hian a ti.
Agriculture & Farmers’ Welfare department-ah mipuiin beiseina sang tak an nei a, an beiseina timittu niloin, tihlawhtlingtu ni thei turin a tul ang zela mahni insiamrem a, sawrkar leh mipui tan theihtawp chhuah zel turin MAS officer-te a chah a. Inlungrual taka mitinin theihtawp kan chhuah theuh chuan, kalphung thar, hmalam pan zel theihna tur danglamna kan thlen thei tih a sawi a ni.
Agriculture Service indaihlohna a nasa – Agriculture minister
