Air Force hnena ram hralh chungchanga Notification chhuah loh chhan chu fimkhur vang

Air Force hnena ram hralh chungchanga Notification chhuah loh chhan chu fimkhur vang
Indian Air Force hnena Lengpui ram leh Sihphir ram hralh chungchangah chanchinbu-ah notification chhuah a ni lo a, hei hi fimkhur a ngaih em vang a ni tih chu House-a an sawi dan a ni.
Budget Session neih mekah February ni 25 khan Lawngtlai West bialtu C Ngunlianchunga zawhna, ziaka chhan chi chhangin land revenue & settlement minister B Lalchhanzova’n chanchinbua notification chhuah loh chhan thil paruk a sawi a ni.
Bangladesh leh Myanmar nena inrinna venhimna atana pawimawh a nih thu te, Operation Sindoor vang te, state huapa mock drill neih a nih vangtein a sensitive em em a ni tiin minister chuan a sawi a, a ni lo zawnga a darh palh a hlauhawm thu sawiin, chu chu chanchinbua notification chhuah a nih loh chhan niin a sawi.
“Lengpui leh Sihphira mimal ram lak tur hi section 40: Special Urgency Clause Notification anga hmalak a nih avangin, India leh a thenawm ram (Bangladesh/Myanmar) border venhimna atana pawimawh (defense strategic matter) a ni a. Tin, India-Pakistan buaina avanga Operation Sindoor ni 07.05.2025-a kalpui hun lai leh state huapa mock drill te pawh neih hun lai a nih avangin, a sensitive em em a, chu mai bakah ram neitute thlan fel tawh leh NOC lak vek tawh a nih avangin (in good faith) puanzar tul lo leh ni lo zawnga a darh palh hlauh vang liau liauva chanchinbua puanzar a ni lo a ni,” minister chuan a ti.
“Lengpui Airport hralh tum anga mipui (public) lamah thu belhchian dawl lo a than nasat vang a ni,” a ti bawk.
He ram lak hna hi LR&S Notification vide memo No K.12011/55/2013-Rev dt 15th May, 2025 anga kalpui a nih thu a sawi a, he notification hi Right to Fair Compensation and Transparency in Land Acquisition, Rehabilitation and Settlement Act, 2013 Section 11, Section 9 (read with section 40: Special powers in case of urgency to acquire land in certain cases) hnuaia chhuah a nih avangin chanchinbuah notification chhuah a ni lo, a ti.
Aizawl DC-in No Objection Certificate a lo pek tawh thu a sawi a, “…Sihphir leh Lengpui khuaa mimal ram lak turte hnen atang pawha No Objection Certificate neih a nih tawh vang a ni,” tiin chanchinbua notification chhuah a nih loh chhan dang a sawi.
Ram venhimna atana pawimawh a nih avangin he ram lak chungchanga document-te chu Right to Information Act, 2005 Section 8(1)(a)-in mipui hnena pe chhuak lo turin hriatthiamna a pe niin a sawi.
Compensation 80% pek a nih hnu, balance 20% pek a nih hmaa site verification neih tumnaah pawh Indian Air Force lamin ram neitu, private organisation, VC te leh driver-te pawh verification awm tur chungchang hrilh hriat an duh lo niin a sawi a, chu chu chanchinbua notification chhuah a nih loh chhan a sawi pakhat a ni.
Lawngtlai West bialtu zawhna chhangin minister hian May ni 15, 2025-ah preliminary notification chhuahin ram lak tum a nih thu a sawi a, final declaration chu July ni 22, 2025-ah chhuah a ni tih a sawi.
Ram lak (acquire) hun zawhna chhangin minister chuan, order for possession chhuah ni, August ni 1, 2015-ah lak a nih thu a sawi.