Air Force hnena ram hralh sorkarin a hriatpui em?
Lengpui leh Sihphir tea ram, Indian Air Force hnena hralh chungchangin titi a luah a, ngaihven pawh a hlawh. Hemi chungchanga thu khel hlawh pakhat chu sorkarin a hriatpui em tih thu hi a ni awm e.
Aizawl DC hmalakna a ni a, sorkarin a hriatpui lo tia sawi an awm a, chumi pawm lo chu an awm bawk.
March ni 6-ah khan Budget Session-ah Lawngtlai West bialtu C Ngunlianchunga zawhna, ziaka chhan chi, “He ram lakna (acquired) turah hian DC office, Aizawl te hian thu tawp an nei em?” tih chu “Ram lakna Land Acquisition reng rengah hian Aizawl DC hi Competent Authority for Land Acquisition ni mah sela, sorkar hriatpuina leh remtihna tel lovin acquisition hi kalpui theih a ni lo,” tiin a chhang.
“ZPM sorkar hian a hriatpui em, he ram laknaah (acquired) hian?” tih zawhna chu “Sorkar hriatpuinaa acquisition hi tih a ni,” tiin a chhang a, “A lo hriatpui lo a nih chuan eng nge a chhan, min hrilh thei em?” tia zawh zuina pawh “Sorkar hriatpuinaa acquisition hi tih a ni,” tiin a chhang a ni.
Ram lak (acquire) tum hi lak a ni ta em tih chu, “Ni e. DC. Aizawl-in order for possession ni 1 August, 2025-ah a chhuah,” tiin a chhang a, ‘Order for possession chhuah ni, ni 1 August 2025-ah lak a ni,” tiin ram lak ni pawh a sawi.
Hemi ni vek hian private resolution pakhat, Indian Air Force hnena ram pek chungchang CBI chhuitir rawtna an sawiho a, resolution sawihonaah hian revenue minister chuan, “Dan zawm loh a awm a nih chuan Aizawl DC te mawhphurhna a ni a. He house zahawm takah hian house leader pawhin revenue mawhphurhna a ni lo e, Aizawl DC te mawhphurhna alawm ka tih tiin he house-ah hian a sawi ngat a ni,” tiin a sawi.
A hmain adviser to cm TBC Lalvenchhunga pawhin January ni 19 khan an party office-a thu a sawi a, Indian Air Force ram lei chu DC level-ah a tawp vek tia sawiin, sorkar hnen thleng lova ram hralh theihna DC level-a a zo vek thei chu mak a tih thu a sawi bawk.
Air Force hnena ram hralh sorkarin a hriatpui em?
