Airport chungchangah sawi dan chi hnih

Mizoram sorkarin Indian Air Force hnena Lengpui Airport hlan a tum a, mahse hemi chungchangah hian thu a chiang rih lo.
IAF hnena hlan tum a ni tih hi mipuiin an hriat dan a ni a, tun hnaiah sorkar lam atangin thu inkalh a rawn ri a, chu chuan khel zui a hlawh mek.
Chief minister-in Lengpui Airport hi IAF hnenah an hralh dawn tih a sawi a, a hralhna sum an thlakhlelh thu pawh a sawi. Chumi hnuah adviser to chief minister (finance)-in IAF kuta hlan an tum lo tiin a sawi ve leh thung. An sawi dan a inang ta lo a, IAF kut thlawhna tumhmun hlan chungchang ai mahin an sawi dan inang lo chungchang hian khel zui a hlawh rih niin a lang.
LPS-in an kawm tumin chief minister Lalduhoma’n Lengpui Airport chungchangah IAF nen an indawr a, MoU pawh an duang tawh tih a sawi a, IAF hian a ram hi an lei dawn tih pawh a sawi.
“A runway atanga lehlam zawng, khu anni’n an chang ang. Chu chu a man kan chhut chhuak anga, an lei ang a leiin. Chu ringawt pawh chu kan thlahlel ve a ni,” a ti.
“Ram mamawh belh kan nei a nih chuan acquisition-ah min buaipui ang a, a man kan pe vek ang, an ti bawk,” tiin chief minister chuan IAF-in ram an mamawh belh a nih pawhin an lei belh thei dawn tih a sawi.
Hetih lai hian adviser to chief minister (finance) TBC Lalvenchhunga’n February ni 17-a ZPM office-ah thu a sawi a, “Mizoram sorkar hian IAF kutah airport kan pe dawn lo a, kan ramin a hlawkpui theihna tur leh changtlung zawka siam kan tum mai a ni,” a ti.
“Airport hi hralh kan tum lo a, hlan kan tum hek lo. IAF kaltlangin changtlung zawka siam theih dan kan dap mek a ni. State danga mipuiten IAF Airport an va tawm zawk ang kha ni lovin Lengpuiah chuan kan airport min rawn tawm ve zawk dawn tihna a ni ber,” a ti bawk.
An sawi dan inang lo hian Lengpui Airport chungchang ngaihventute titi a siam a, inhnialna pawh a thlen.
NGO Coordination Committee-in Lengpui Airport hi IAF hnena hlan/hralh an phal lo a, dodal an tum. IAF hnena hlan remti lotute’n Lengpui Airport Forum an din a, anni pawh hian dodal an tum. Val Upa Council pawh an kawm tawh tih thu dawn a ni.