Tripura Natural Gas Company Limited (TNGCL) leh Mizoram Food Civil Supply & Consumer Affairs tangdun buatsaih, pipe hmanga gas semchhuah dan tur chu Ninagni khan Aizawlah inhrilhfiah a ni.FCS&CA minister B Lalchhanzova chuan gas pipe hmanga Tripura atanga Mizorama natural gas thlunzawm hna thawh endikin kumin January khan Agartala a tlawh tih a sawi a. Tripura-ah chuan kum 30 chuang piped natural gas (PNG) hman a ni tawh a, state dangah chuan domestic mai ni lo, lirtheiah pawh compressed natural gas (CNG) hman niin, hotel leh restaurant siama eizawngte tan pawh sum sen a tlahniam dawn tih a sawi a ni.
2027 March-a Indradhanush Gas Grid Limited (IGGL) in Sihhmui thleng gas pipeline an phum thlen hnua TNGCL-in Aizawl leh Mamit-a PNG hmang theiin an thlung lut anga, 2028 kumtir chhoah Aizawl mipuiin an hman tan theih beisei chungin hma lak lawk theih ang ang a ranglama bawhzui tan tumin an bei tih a sawi.
Mipui lo puahchah lawknan an zawhna leh rinhlelhna neihte chhan sak turin he hun buatsaih a ni tih sawiin, “Mizoram-in India rama state dang leh hnam dang nena inpawhna thuk zawk a neih theihnan Mizo mipuiin state dang leh ram dang tlawhpawhin kan thiamna kan phochhuak tur a ni a, khualtha chhawn danah leh inlaichinna tha siam kawngah tan kan la tur a ni,” B Lalchhanzova hian a ti.
TNGCL managing director Pralay Patra chuan natural gas chungchang, khawvel boruak chhe zual zel leh lum tulh tulhah natural gas hman a that zawk thu, sawrkar laipuiin kum 2030 hmain energy source 15% chu natural gas nih tir a tum dan a sawi a. He hmasawnna hi sumdawnna mai ni loin, khawvel boruak chhe zel tur dalna pakhat a ni tih a sawi.
TNGCL presentation-a a lan danin, India sawrkara Petroleum and Natural Gas Regulatory Board chuan uar zawka natural gas hman a nih theihnan state & UT (Andaman & Nicobar Islands leh Lakshadweep tih loh) ah City Gas Distribution Network siamnan entity ho hnenah thuneihna a pe tawh a. TNGCL hian Mizoram leh Manipur a chang.
Inhrilhhriatnaah hian sawrkar department hrang hrang aiawh leh a kaihhnawih pawl, tlawmngai pawl, thuthar sumdawng pawl, bank aiawh, thuthar thehdarh lam thawktute intelkhawmna pawl leh environment/ social activist an tel.
Gas pipeline leh Mizoram:
8 Natural gas pipeline hi Panisagar Terminal Tripura atanga intanin Sihhmui Mizoram-ah Receiving Terminal bun a ni dawn a ni.
8 Panisagar leh Sihhmui inkar pipe thui zawng hi km 119.5 niin, pipe diameter hi feet 1 a ni a, leimin leh shock laka him tur pipe hman a ni.
8 Pipeline hian Kanhmun, Zawlnuam, Kawrthah, Tuidam, Darlak, Mamit, Lengte a paltlang dawn a; Panisagar – Sihhmui inkara pipe phum hna hi IGGL-in thawkin, Sihhmui Terminal atanga Aizawl khawpui chhunga gas sem darh leh enkawlzui hna chu TNGCL-in a chang thung ang.
8 Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni a. Tripura – Mizoram Gas Pipeline Project hi North East Natural Gas Pipeline Grid hnuai ami niin, 2027 December velah thawh zawh hman beisei a ni a, tunah zaa 45 vel thawh zawh tawh a ni.
Aizawl-a gas pipeline luh tir tum dan Aizawlah inhrilhfiah
