Aizawl-ah ngei Basketball inelna lian

June 22 atangin hmarchhaka mipa kum 19 hnuailam basketball inelna, Northeast Elite Basketball League Season 1 chu Aizawlah khelh tan a ni dawn.
Hmarchhaka rawltharte tana basketball league buatsaih tur chungchang hi a buatsaihtute leh inelna thlengtu tur, Mizoram Basketball Association (MBBA) hruaitute chuan Ningania Aizawl Press Club-a thuthar thehdarhtute an kawmnaah an puang a. Inelna hi Aizawla basketball uar veng 10 – Bungkawn, Chaltlang, Chanmari, Chawnpui, Dawrpui, Nursery Veng, Saron Veng, Tuikual South Zarkawt leh Zemabawk-a innghat team (franchise) inelna tur a ni.
Team tina player-te hi player chhawp chhuah atanga lak khawm (draft pick) tur a ni a. Player lak khawm tur hi team behchhan vengten a tlem berah player pali an thawh leh hmarchhak state dang paruk ami player 10 theuh an ni dawn a. Hengte hian trial an nei anga, team hian an thlang chhuak leh dawn. Team 10 hi pool hnihah panga ve vea thenin an inkhel kual dawn a ni.
India rama state pakhat aia tam telna junior basketball league lian ber pawl tling tura ngaih hi a hmunah man chawia en theih a nih dawn bakah TV leh YouTube atanga en theiha chhawp chhuah tum a ni bawk.
MBBA-in a thlen tur Northeast Elite Basketball League season hmasa ber hi R Dengthuama Hall Mualpui Salem Venga khelh tura ruahman a ni a, ni 10 vel chhunga khelh zawh tum a ni ang.
Champion team-in Rs. 1,50,000, pahnihnain Rs. 75,000 leh pathumnain Rs. 50,000 an dawng dawn a. Season 1 atan bik hian a buatsaihtute chuan prize money nen vek hian cheng nuai 40-45 vel an ruahman tih an sawi a ni.
Inelna hi season nga chhung MBBA hian thleng tura ruahman phawt a ni a, a hnu lam zel chu state dangah pawh a tul anga nghah a ni ang. Henga player tha zual hi a hranpaa la hrual chhoh a, Indian Basketball League thlenga khel thei turin, lehkha zirna lam thlenga sponsorship bakah stipend neia enkawl zui tum a ni tih ABC Basketball Development League Pvt Ltd Aniruddha Pole chuan a sawi.
Mizoram an thlan kher chhan chu, tun dinmunah hmarchhak bikah Mizoram aia basketball game a nun na state dang a awm lo tih a sawi a ni.
League hi ABC Basketball Development League Private Limited leh ACG-in an buatsaih tur a ni a. ABC hi Pune-a hmunpui nei, Maharashtra Basketball League pawh buatsaih mek an ni a, Kerala lamah an lut mek bawk.